Հայկական որ ընկերությունն է հայտնվել ԱՄՆ պատժամիջոցների տակ

Հայաստանում գործող «Տակո» ՍՊԸ-ն (Taco LLC) ներառվել է Ռուսաստանի դեմ ԱՄՆ նոր պատժամիջոցների ենթակա կազմակերպությունների ցանկում, ասվում է ԱՄՆ ֆինանսների նախարարության կայքում։

Նշվում է, որ ԱՄՆ ֆինանսների նախարարության արտաքին ակտիվների վերահսկողության գրասենյակը (OFAC) ընդլայնել է այն անձանց և ընկերությունների ցանկը, որոնք ենթակա են հակառուսական պատժամիջոցների։

Դրանց թվում է ռուսական «Ռադիոավտոմատիկա» ՍՊԸ-ի հայ գործընկեր «Տակո» ՍՊԸ-ն: Ըստ ԱՄՆ Ֆինանսների նախարարության հայտարարության՝ «Ռադիոավտոմատիկա» ընկերությունը պաշտպանական գնումների ռուսական ընկերություն է, որը մասնագիտացած է Ռուսաստանի պաշտպանական արդյունաբերության համար արտասահմանյան ապրանքներ ձեռք բերելու մեջ: «Ռադիոավտոմատիկա»-ն վճարում է  «Տակո»-ին բաղադրիչների ներմուծման և Հայաստանի տարածքում գնումների գործընթացն իրականացնելու համար: Ավելին,  «Տակո»-ն համագործակցում է Չնաստանում գործող «Սիննո» ընկերության հետ, որը նույնպես կապված է «Ռադիոավտոմատիկա»-ի հետ: Նշվում է, որ «Սիննո»-ն շարունակական հարաբերություններ է պահպանել «Ռադիոավտոմայկա»-ի հետ՝ Ուկրաինա Ռուսաստանի հետագա ներխուժումից առաջ և հետո:  

Պատժամիջոցների ենթարկված իրավաբանական անձանց ցանկում ներառված են նաև Ռուսաստանի Դաշնությունում, Չինաստանում և Բելառուսում գործող ընկերությունները։