Բանակցային գործընթացի մասին տեղյակ են բավականին լայն շրջանակի մարդիկ, ոչ միայն մեր թիմակիցները․ Փաշինյան

Հանրային հեռուստաընկերությանը տված հարցազրույցում վարչապետ Նիկոլ Փաշինյանն արձագանքեց ՀՀ առաջին նախագահ Լևոն Տեր-Պետրոսյանի հայտարարությանը, ըստ որի, անհրաժեշտ է կոնսոլիդացիա՝ իշխանության շուրջ։

«Պետք է հասկանալ՝ ինչ է նկատի առնվում, որովհետև եթե կա այդպիսի համատեքստ, թե իշխանությունն ի վիճակի չէ պատասխանատվություն վերցնել և նրան պետք է ինչ-որ բանի համար օգնել՝ պատասխանատվություն վերցնել, ես կարող եմ ասել, որ իշխանությունը՝ կառավարությունը և անձամբ ես, գիտակցում ենք երկրի ճակատագրի համար ունեցած պատասխանատվությունը և այդ պատասխանատվությունը մենք պատրաստ ենք վերցնել, այդ պատասխանատվութունը մենք ստացել ենք մեր ժողովրդից», - այս առնչությամբ ասաց Նիկոլ Փաշինյանը։

Վերջինս անդրադարձավ նաև ՀՀ առաջին նախագահի այն մտքին, որ բանակցային գործընթացի մանրամասներին տեղյակ է միայն վարչապետին մերձ շատ նեղ շրջանակ։ Այդ միտքը Նիկոլ Փաշինյանը «թյուրիմացություն» որակեց։

«Դա թյուրիմացություն է, որովհետև բանակցային գործընթացի մասին, ընդհուպ տառերի, նախադասությունների մակարդակով, տեղյակ են բավականին լայն շրջանակի մարդիկ, ոչ միայն մեր թիմակիցները», - ասաց Նիկոլ Փաշինյանը։

Նրա խոսքով՝ բանակցային գործընթացի մանրամասներին տեղյակ է ինչպես «Քաղաքացիական պայմանագիր» կուսակցությունը, այնպես էլ Անվտանգության խորհուրդը, Արցախի իշխանությունները։

«Ես ճիշտ եմ համարում, որ պետք է տեղյակ պահեմ ԼՂ նախագահին։ Ես գիտեմ, որ նա էլ իր հերթին տեղյակ է պահում առնվազն ԱԽ-ին, եւ նախկին բարձրաստիճան պաշտոնյաների, եւ ուզում եմ ընդգծել, որ խորհրդակցության անդամների մի մասն, իմ կարծիքով, այս բերումով տեղյակ է ամբողջությամբ բանակցային պրոցեսից, մյուս մասը տեղյակ լինելու հնարավորություն միշտ էլ ունեցել է, որովհետեւ ես միշտ էլ պատրաստակամություն եմ հայտնել մասնավորապես խորհրդարանական ընդդիմության ներկայացուցիչներին ներկայացնել բանակցություններն ամբողջությամբ»,-նշել է նա ու հավաստիացրել՝ 5 նախագահների հանդիպման մասնակիցների մի մասը ամբողջությամբ տեղյակ են բանակցություններից։

Նա նշեց, որ խորհրդարանական 2 ընդդիմադիր խմբակցությունները, ինչպես նաև Լևոն Տեր-Պետրոսյանի ղեկավարած ՀԱԿ կուսակցությունը հրաժարվեն են բանակցությունների վերաբերյալ իր հայտնած տեղեկությունները ստանալուց։

Փաշինյանի խոսքով՝ ինքը պատրաստ է հանդիպել 5 նախագահների հետ, սակայն պետք է հասկանալ՝ ինչի համար», - ասաց Նիկոլ Փաշինյանը։