Թուրքիան հավանություն չի տա Շվեդիայի և Ֆինլանդիայի՝ ՆԱՏՕ-ին միանալուն. Էրդողան

Թուրքիայի նախագահ Ռեջեփ Թայիփ Էրդողանը հայտարարել է, որ կմնա իր դիրքորոշմանը Շվեդիայի և Ֆինլանդիայի՝ ՆԱՏՕ-ին միանալու հարցում։ Այս մասին նա ասել է խորհրդարանում ունեցած ելույթի ժամանակ, փոխանցում է Anadolu գործակալությունը։

Նշվում է, որ Էրդողանն ասել է, որ Անկարայի սկզբունքային և վճռական դիրքորոշումը Շվեդիայի և Ֆինլանդիայի՝ Հյուսիսատլանտյան դաշինքին միանալու հարցում կմնա անփոփոխ, քանի դեռ Թուրքիային տրված խոստումները չկատարվեն։

Ավելի վաղ Ֆինլանդիայի արտգործնախարար Պեկկա Հաավիստոն հայտարարել էր, որ երկրի, ինչպես նաև Շվեդիայի և Թուրքիայի պատվիրակությունները կարող են հանդիպել հոկտեմբերին ՆԱՏՕ-ին անդամակցելու գործընթացի շուրջ։

Մինչ այս ՆԱՏՕ-ի գլխավոր քարտուղար Յենս Ստոլտենբերգը վստահություն էր հայտնել, որ Ֆինլանդիան և Շվեդիան շուտով կմիանան դաշինքին։ Նա բացատրել է, որ այս երկրները համաձայնության են եկել Թուրքիայի հետ, չնայած այն հանգամանքին, որ Անկարան նախկինում «անհանգստություն էր հայտնել» մի շարք հարցերի շուրջ։

Մայիսին գլխավոր քարտուղար Ստոլտենբերգն ընդունել էր Ֆինլանդիայի և Շվեդիայի՝ ՆԱՏՕ-ին անդամակցելու դիմումները։ Թուրքիան, մինչդեռ, արգելափակել էր բանակցությունների մեկնարկը՝ Շվեդիային և Ֆինլանդիային առաջադրելով մի քանի պայմաններ։ Մասնավորապես, դրանք վերաբերում են Թուրքիայում ահաբեկչական ճանաչված կազմակերպությունների գործունեության արգելքին, ինչպես նաև Անկարայում պաշտպանական արդյունաբերության սահմանափակումների վերացմանը։