ՀԱՊԿ-ի ներսում բավական հավակնություններ կան, և այդ մասին պետք է բաց խոսել․ Բելառուսի արտգործնախարար

Բելառուսի արտգործնախարար Վլադիմիր Մակեյը հույս ունի, որ նոյեմբերի 23-ին Երևանում կայանալիք ՀԱՊԿ գագաթնաժողովը վճռական ներդրում կունենա կազմակերպության կատարելագործման գործում։ Այս մասին նա լրագրողներին ասել է երկրների ղեկավարների մակարդակով միջպետական ​​ֆորումից առաջ, տեղեկանում ենք ԲԵԼՏԱ-ից։

«Ակնկալում ենք, որ այս գագաթնաժողովն արդյունավետ կլինի, և հանդիպումը պետք է որոշիչ ներդրում ունենա մեր կազմակերպության բարելավման գործում: Մենք իսկապես պետք է հասնենք այնպիսի վիճակի, որ մի շարք այլ ինտեգրացիոն կառույցներ, կազմակերպություններ՝ տարածաշրջանային, միջազգային, հաշվի նստեն ՀԱՊԿ-ի հետ։ Դա անելու համար ինքներս պետք է ամեն ինչ անենք, որպեսզի մեր կազմակերպության ներսում տիրի կորպորատիվ համերաշխություն, որպեսզի պահպանենք անվտանգությունը ՀԱՊԿ տարածքում, որպեսզի իսկապես փորձենք լսել միմյանց, երբ խոսում ենք ինչ-որ բաների մասին: Պետք է խոսել այդ մասին բացահայտ և անկեղծորեն, ինչպես անում են իսկական ընկերները, դա միակ ճանապարհն է հասնելու այն նպատակներին, որոնք դրել եք ձեր առջև»,- ասել է նախարարը։

Նկատի ունենալով, որ Բելառուսը Հայաստանից ստանձնելու է ՀԱՊԿ նախագահությունը՝ Վլադիմիր Մակեյին մանրամասներ են խնդրել այն առաջնահերթությունների մասին, որոնք պետք է հայտարարի երկրի ղեկավար Ալեքսանդր Լուկաշենկոն գագաթնաժողովում։

Նախարարը նշել է, որ, ընդհանուր առմամբ, Բելառուսի դիրքորոշումը ՀԱՊԿ-ի հետ կապված հարցերում չի փոխվում։ «Արմատապես ոչինչ չի փոխվում: Մենք միշտ հանդես ենք եկել բոլոր վեճերի և հակամարտությունների խաղաղ կարգավորման օգտին: Բնականաբար, մոտեցումները փոխվում են՝ կախված մեր տարածաշրջանում, աշխարհում տիրող իրավիճակից. Մենք պետք է հաշվի առնենք դա: Մենք այդ մասին խոսում ենք բաց և անկեղծ: Մենք բացարձակապես բաց ենք անկեղծ երկխոսության համար մեր կազմակերպության զարգացման հետագա ուղիների վերաբերյալ»,- ասել է Վլադիմիր Մակեյը:

Ինչ վերաբերում է առաջնահերթություններին, ԱԳ նախարարը նշել է, որ Լուկաշենկոն շատ մանրամասն կուրվագծի դրանք։ «Մենք փորձեցինք դրանք պատրաստել այնպես, որ գալիք տարվա ընթացքում վճռորոշ ներդրում ունենանք մեր կազմակերպության բոլոր ոլորտների բարելավման գործում»,- մանրամասնել է նախարարը։

Պատասխանելով ԲԵԼՏԱ-ի հարցին, թե արդյոք ՀԱՊԿ-ն այժմ անցնում է ճգնաժամային ժամանակաշրջան՝ հաշվի առնելով, ի թիվս այլ բաների, մի շարք տեղական ռազմական հակամարտությունները, որոնցում ներգրավված են կազմակերպության անդամները, նախարարն ասել է. «Ցանկացած կազմակերպություն, անշուշտ, ենթակա է որոշակի ճգնաժամերի՝ կախված միջազգային իրավիճակի զարգացումից, կոնկրետ տարածաշրջանում իրավիճակից։ Չէի ասի, որ կազմակերպությունն ինչ-որ ճգնաժամի միջով է անցնում, բայց կան որոշակի խնդրահարույց պահեր, որոնց մասին պետք է անկեղծորեն խոսել։ Չնայած ես ներկայացնում եմ ԱԳՆ-ն, բայց եթե այս իրավիճակում դիվանագիտորեն խոսենք առկա խնդիրների մասին, ապա ոչ մի դրական արդյունքի չենք հասնի։ Ուստի պետք է քննարկել այդ խնդրահարույց հարցերը, որոնք կան, և փորձել գտնել դրանց լուծման հայեցակարգ»։

Բելառուսի արտաքին գործերի նախարար Վլադիմիր Մակեյն ասել է, որ ՀԱՊԿ անդամ երկրները բազմաթիվ հավակնություններ ունեն միմյանց նկատմամբ․

«Ցավոք, եկեք անկեղծ լինենք, միմյանց դեմ բավականին շատ հավակնություններ կան: Եվ պետք է այդ մասին խոսենք բաց և անկեղծ, ինչպես անում են իսկական ընկերները: Սա միակ ճանապարհն է հասնելու այն նպատակներին, որոնք դնում ես քո առջև»,- Երեւանում լրագրողներին ասել է նախարարը։