Թուրքիան հրաժարվել է թույլտվություն խնդրել ռազմական գործողությունների համար

Թուրքիայի իշխանությունները հրաժարվել են ՆԱՏՕ-ի դաշնակիցներից Սիրիայում ռազմական գործողություն իրականացնելու թույլտվություն խնդրել։ Այս մասին հայտնում է Anadolu-ն՝ հղում անելով երկրի նախագահի պաշտոնական ներկայացուցիչ Իբրահիմ Քալինին։

«Թուրքիան չի պատրաստվում թույլտվություն խնդրել երկրի ազգային անվտանգության ապահովման նպատակով գործողություններ իրականացնելու համար»,- ասել է նա լրատվական գործակալությանը։

Այդուհանդերձ, Թուրքիայի նախագահի մամուլի քարտուղարը նշել է, որ կառավարությունը պատրաստ է դաշնակիցների հետ քննարկել իր գործողությունները Սիրիայի հյուսիսում և Իրաքում։ «Երբ կա սպառնալիք, այդ թվում՝ հարձակում կամ ահաբեկչություն, Թուրքիան քննարկում է իրավիճակը ՆԱՏՕ-ի բոլոր դաշնակիցների հետ։ Մենք մեր գործընկերներից ակնկալում ենք համատեղ քայլեր, իսկ նման քայլերի բացակայության դեպքում, ինչպես արդեն հայտարարել է նախագահ Ռեջեփ Թայիփ Էրդողանը, մենք պատրաստ ենք ինքնուրույն լուծել խնդիրը»,- ասել է Քալինը։

Նա նաեւ նշել է, թե իբր Թուրքիայի գործողությունները տարածաշրջանում հիմնված են ՄԱԿ-ի կանոնադրության 51-րդ հոդվածի վրա, որը երկրներին տալիս է ինքնապաշտպանության իրավունք։ Բացի այդ, Քալինն ասել է, որ «այն երկրները, որոնք իրենց դեմ չնչին սպառնալիքի դեպքում, առանց նույնիսկ մտածելու, հարվածում են իրենց սահմաններից տասնյակ հազարավոր կիլոմետր հեռավորության վրա գտնվող տարածքներին, վրդովմունք են հայտնում իր սահմանների մոտ Անկարայի գործողությունների կապակցությամբ»: