Սննդաբաններն անվանել են այն մթերքները, որոնք նվազեցնում են կանանց մոտ կոտրվածքների վտանգը

Մեծ Բրիտանիայի Լիդսի համալսարանի գիտնականները պարզել են, որ կանանց համար օրական 25 գրամ սպիտակուցի ավելացումը կապված է ազդրի կոտրվածքի ռիսկի 14%-ով նվազեցման հետ: Բացի այդ, յուրաքանչյուր լրացուցիչ թեյի կամ սուրճի բաժակը կապված է ռիսկի 4%-ով կրճատման հետ: Հետազոտությունը հրապարակվել է Clinical Nutrition ամսագրում:

Հետազոտողները հետևել են 26 000 կնոջ: Ուսումնասիրությանը ընդգրկվելու պահին (1995-1998 թթ.) կանայք եղել են 35-69 տարեկան:

Մասնակիցներին առաջարկվել է լրացնել հարցաթերթիկներ իրենց սննդակարգի և ապրելակերպի վերաբերյալ: Հարցաթերթիկի տվյալները, հաջորդ երկու տասնամյակների հիվանդանոցային գրառումների հետ միասին, այնուհետև օգտագործվել են ռիսկի գործոնները վերլուծելու համար: Հետազոտման ընթացքում կանանց 3%-ից մի փոքր ավելին ազդրի կոտրվածք է ստացել:

Միջինում հավելյալ 25 գրամ սպիտակուցը նվազեցնում է ազդրի կոտրվածքի վտանգը 14%-ով, սակայն թերքաշ կանանց դեպքում պաշտպանիչ ազդեցությունն ավելի մեծ է։ Գիտնականները ենթադրում են, որ թերքաշ կանայք կարող են ունենալ ավելի ցածր ոսկրային խտություն և մկանային զանգված, որոնք ինքնին հանդիսանում են ազդրի կոտրվածքների ռիսկի գործոններ:

Թեյի և սուրճի պաշտպանիչ ազդեցությունը կարող է կապված լինել դրանցում կենսաբանորեն ակտիվ միացությունների՝ պոլիֆենոլների և ֆիտոէստրոգենների պարունակության հետ, որոնք կարող են օգնել ոսկորների առողջության պահպանմանը:

Երեքից չորս ձուն, սթեյքը, ընկուզեղենը պարունակում է մոտ 25 գրամ սպիտակուց: Սպիտակուցները կյանքի հիմնական բաղադրիչներն են և անհրաժեշտ են բջիջների, հյուսվածքների և մկանների պատշաճ գործունեության, ինչպես նաև ոսկորների առողջության համար:

Մեծ Բրիտանիայում առաջարկվող սպիտակուցի ընդունումը կազմում է օրական 0,8 գրամ մարմնի քաշի մեկ կիլոգրամի դիմաց, ինչը, որոշ սննդաբանների կարծիքով, չափազանց ցածր է: Սպիտակուցը պարունակվում է մսի, կաթնամթերքի, ձվի, ընդեղենի և ընկույզի մեջ: Այնուամենայնիվ, շատ մեծ քանակությամբ սպիտակուցի ընդունումը (2-3 գ մեկ կգ մարմնի քաշի համար) կարող է ունենալ առողջության վրա բացասական ազդեցություն, որոնք հաշվի չեն առնվել այս ուսումնասիրության մեջ: