Դատավոր Մեսրոպ Մակյանի եղբայրը մեղադրվում է Ղազախստանում հարկեր չվճարելու մեջ

Վերաքննիչ քրեական դատարանի դատավոր, ԲԴԽ անդամ Մեսրոպ Մակյանի եղբայրը՝ Արթուր Մակյանը, մեղադրվում է Ղազախստանում առանձնապես խոշոր չափերով հարկեր չվճարելու մեջ։

Քրեական գործը հարուցվել է Ղազախստանում՝ դեռևս 2015-2016թթ ենթադրյալ դեպքերի վերաբերյալ, հետագայում ուղարկվել է Հայաստան ու այժմ գտնվում է Երևանի ընդհանուր իրավասության դատարանի վարույթում, մակագրվել է դատավոր Մանվել Շահվերդյանին։

Ըստ մեղադրանքի, Արթուր Մակյանը, 2015-16թթ ընկած ժամանակահատվածում, Ղազախստանի Կոստանայ քաղաքում, հանդիսանալով «Ժուզ Ժոլ» ՍՊԸ տնօրեն, հարկեր վճարելուց խուսափելու համար, առանց աշխատանքների փաստացի իրականացման, ծառայությունների մատուցման օգտագործել է «Սոյուզ 7» ՍՊԸ-ի ԲՆՀ 140940023435 և «Բարակատ Տեկս KZ» ՍՊԸ-ի ԲՆՀ 111040017504 կեղծ նախնական հաշվապահական փաստաթղթերը, որոնց մեջ արտացոլված են եղել «Ժուզ Ժոլ» ՍՊԸ-ին անհրաժեշտ ծառայությունները (աշխատանքները), որոնք «Սոյուզ 7» ՍՊԸ-ն և «Բարակատ Տեկս KZ» ՍՊԸ-ն իրենց հերթին չեն մատուցել և չեն իրականացրել «Ժուզ Ժոլ» ՍՊԸ-ի համար, սակայն դրանք անհրաժեշտ են եղել ԱԱՀ-ի գումարների դիմաց անօրինական հաշվանցման և կատարված ծախսերի ուռճացման համար:

«Օգտագործելով տվյալ փաստաթղթերը՝ Ա.Մակյանը, «Ժուզ Ժոլ» ՍՊԸ-ի հաշվապահական փաստաթղթերում և հարկային մարմին ներկայացված հաշվետվություններում մտցրել է ՍՊԸ-ի տնտեսական և ֆինանսական գործունեության մասին ակնհայտ կեղծ տվյալներ՝ արտացոլելով «Ժուզ Ժոլ» ՍՊԸ-ի ԱԱՀ-ով հաշվապահական հաշվառման և հարկային հայտարարագրերում 2015 թվականի 2-րդ եռամսյակի համար՝ 2015 թվականի օգոստոսի 15-ի ԱԱՀ-ի հերթական հայտարարագրում և 2015 թվականի հոկտեմբերի 06-ի ԱԱՀ-ի լրացուցիչ հայտարարագրում, ինչպես նաև 2015 թվականի նոյեմբերի 09-ին հանձնված, 2015 թվականի 3-րդ եռամսյակի համար ներկայացված հայտարարագրում և ԿԵՀ 2015 թվականի համար հարկային հաշվետվությունում՝ խուսափելով 2015 թվականի 2-3 եռամսյակների համար առանձնապես խոշոր չափի՝ 83.230.465 ՀՀ դրամին համարժեք 38.079.015 տենգե գումարի ԱԱՀ և 2015 թվականի համար 77.815.559 ՀՀ դրամին համարժեք 54.548.707 տենգե գումարի ԿԵՀ պետական բյուջե վճարելուց»,- նշված է մեղադրանքում։

Արթուր Մակյանին մեղադրանք է ներկայացվել ՀՀ քրեական օրենսգրքի 290-րդ հոդվածի 3-րդ մասի 2-րդ կետով՝ առանձնապես խոշոր չափերով հարկեր չվճարելու հատկանիշներով, նրա նկատմամբ որպես խափանման միջոց է ընտրվել բացակայելու արգելքը։