Փորձում են զսպել Ադրբեջանի նկրտումները․ քաղաքագետը՝ Սյունիքում ՌԴ հյուպատոսության բացման մասին

«Այս քայլով պետությունները ուզում են շեշտել իրենց ներկայությունը տարածքում, տվյալ դեպքում՝ Հայաստանում, ինչպես նաև դա քայլ է, որով փորձում են զսպել Ադրբեջանի նկրտումները այդ տարածքի նկատմամբ»,-ԼՈՒՐԵՐ.com-ի հետ զրույցում այս տեսակետը հայտնեց քաղաքագետ Ալեքսանդր Մանասյանը` անդրադառնալով Դենիս Գոնչարի՝ ՏԱՍՍ–ին տված հարցազրույցին, որտեղ ՌԴ ԱԳՆ ԱՊՀ երկրների հարցերով զբաղվող չորրորդ դեպարտամենտի ղեկավարը հայտարարել էր, որ սեպտեմբերին ռուս դիվանագետներն արդեն Սյունիքում կլինեն հյուպատոսության բացման համար։ 

«Սա որևէ վճռական քայլ չէ, որովհետև մենք ունենք հյուպատոսության, ինստիտուտից ավելի բարձր ինստիտուտ` դեսպանատունը և դեսպանատունը այդ նույն իմաստով ինչ-որ բան նշանակում է, բայց չի պայմանավորում քաղաքական հարաբերությունների ամբողջ գործընթացը։  

Այնուամենայնիվ, հյուպատոսության բացումը Սյունիքում բարի կամքի և քաղաքական դիրքորոշման դրսևորում է» ասաց նա։

Այն հարցին, թե այս քայլից հետո թշնամին արդյոք ավելի քիչ նկրտումներ կունենա Սյունիքի նկատմամբ, մեր զրուցակիցը պատասխանեց, որ ենթադրվում է, որ դա այդպես պետք է լինի, բայց Ադրբեջան կոչվածը չի կատարում միջազգային դատարանի որոշումները և խաղաղապահ ուժերի ներկայությունը արհամարհելով՝ գրավում է հայկական տարածքներ, Արցախում ստեղծում է սոսկալի իրավիճակ․

«Խաղաղության պայմանագիր տանող ճանապարհը երկար է։ Ոչ մի փաստաթուղթ չի կարող բերել նրան, ինչ նրանում գրված է, եթե չկա ուժերի հավասարակշռություն և դա չի ապահովում ուժով, ապա դա խաղաղություն չէ։ 1918թ․- ին Բաթումիում թուրքերը հայ դիվանագետներին ասել են` դուք այս թղթերին հավատում եք, մենք՝ ոչ և մինչև հիմա էլ իրենք այդպես են՝ թուղթը թուղթ է, գործը՝ գործ, ուժը՝ ուժ»,-ասաց Մանասյանը։

Քաղաքագետի խոսքով` մենք դուրս չենք գա այս ծուղակից այնքան ժամանակ, մինչև մեր թույլ տված սխալները չգիտակցենք, մինչև մեր բանաձևերը չփոխենք։

Լիլիթ Զալիբեկյան