Ադրբեջանը չի կատարի Արցախի վերաբերյալ ՄԱԿ-ի անվտանգության խորհրդի հորդորը․ Ավետիք Իշխանյան

Այսօր ՄԱԿ-ի ԱԽ բաց քննարկման է ներկայացվում «Հակամարտային իրավիճակներում պարենային անվտանգության ապահովումը և սովի բացառումը» թեման։ Հայկական կողմից ԼՂ իրավիճակը ներկայացրել է ՀՀ ԱԳ նախարարի տեղակալ Վահե Գևորգյանը։

ԼՈՒՐԵՐ.com-ի հետ զրույցում իրավապաշտպան Ավետիք Իշխանյանը ասաց, որ ՄԱԿ-ի անվտանգության խորհրդի երկրների ներկայացուցիչները խորը մտահոգություններ կարտահայտեն և կհորդորեն Ադրբեջանին բացել Բերձորի միջանցքը, կարելի է չկասկածել։

Իշխանյանը վստահ է, որ այն որպես կատարման պարտադիր բանաձև չի ընդունվելու։ Ըստ նրա՝ ինչպես Ադրբեջանը չի կատարում նույն ՄԱԿ-ի դատարանի վճիռը, այնպես էլ չի կատարի ՄԱԿ-ի անվտանգության խորհրդի հորդորը․

«Կարծում եմ, որ Հայաստանի և Արցախի իշխանություններն արդեն դիմել են միջազգային բոլոր «արդյունավետ» միջոցներին՝ Մինսկի խմբի համանախագահ երկրներ, ՄԱԿ, ԵԽ, տարբեր այլ երկրների, օրինակ՝ Չեխիա, Բուրկի Նաֆասո և այլն»,- ասաց նա և հավելեց,  որ  հայ քաղաքական միտքը մնացել է 19-րդ դարի մտածողության մեջ՝ հույսը դնելով «քաղաքակիրթ աշխարհի» վրա։

Իրավապաշտպանի խոսքով` Արցախի շրջափակումը վերացնելու և Արցախը փրկելու համար, որպես առաջին պայման, պետք է, որ Հայաստանը պաշտոնապես հրաժարվի Արցախը Ադրբեջանի տարածք ճանաչելուց։ Մեր զրուցակիցը շեշտեց,  որ դա միայն հայտարարություն չպետք է լինի, այլ նախապես կազմակերպված մի շարք գործողություններին և հայտարարությանը պետք է նախորդի  ողջ հայ ժողովրդի համախմբումը՝ հանուն Արցախի փրկության, վերականգնվի դաշնակցային հարաբերությունները Ռուսաստանի հետ՝ նախապես համաձայնության գալով, իրականացվի համատեղ զորավարժություններ Իրանի հետ․

«Այսօր Հայաստանում ունենք մի իշխանություն, որի գործողությունները համաձայնեցված են թուրք-ադրբեջանական տանդեմի հետ և որի նպատակն է տարածաշրջանից հեռացնել Ռուսաստանին՝ նրան փոխարինելով Թուրքիայով։

Այս նպատակին հասնելու համար Հայաստանի վարչապետ կոչեցյալը զոհաբերում է Արցախը։ Իսկ մնացած՝ այսպես ասած դիմումները միջազգային մարմիներին, ուղղակի ձևեր թափել է, ուրիշ ոչինչ։

Եթե նա դույզն իսկ ինքնասիրություն ունենար և մտածեր Արցախի մասին, ապա կդադարեցներ ցանկացած շփում Ադրբեջանի հետ, քանի դեռ Արցախը շրջապափակման մեջ է և չեն վերադարձել մեր գերիները։

Այնպես որ՝ Արցախի փրկության բանալին Հայաստանում շուտափույթ իշխանափոխությունն է, այլ ելքեր ես չեմ տեսնում»,- ասաց  Իշխանյանը։

Ավետիք  Իշխանյանի խոսքով` ինչ վերաբերում է Արցախի իշխանություններին, ապա իհարկե, շատ բարդ է, նրանց խորհուրդներ տալը, բայց իր համոզմամբ, Արցախի փրկության համար պետք է լինել համառ և դիմանալ շրջափակմանը՝ երբեք չգնալով Բաքվի և Երևանի նախագծած ուղիով։

Լիլիթ Զալիբեկյան