Հրատարակություններ` նվիրված հայ գրատպության 500-ամյակին

Հայ գրատպության 500-ամյակին նվիրված` Իտալիայի միջոցառումների մեկնարկը նշանավորվեց ոչ միայն ցուցահանդեսային շքերթով, այլև այն ներկայացնող կատալոգներով ու գրքույկներով:

Վենետիկյան մեկնարկի շրջանակներում հանրահայտ «Սկիրա» տպագրատան կողմից հրատարակվել է «Հայաստան.քաղաքակրթության դրոշմներ» խորագրով ցուցահանդեսի մեծածավալ` 400 էջից բաղկացած կատալոգը, որը ներառել է անվանի հայագետների` մասնավորապես` իտալական ակադեմիայի անդամների աշխատանքները:

Կատալոգում հայ բազմադարյան մշակույթը ներկայացնող ցուցահանդեսային նմուշների լուսանկարներից զատ, իտալերենով և հայերենով զետեղված շուրջ 20 հոդվածները ընթերցողին համակողմանի ներկայացնում են «Հայ գիրն ու գրավոր մշակույթը», «Քարի կերպարից մինչև մատյանի իմաստնությունը», «Հայ միջնադարյան մանրանկարչությունը», «Գրական մշակույթն ու ինքնությունը», «Գիտական միտքը Հայաստանում»: Կատալոգում անդրադարձ է կատարված նաև «Հայ պատմության խորհրդանշական մտքին», «Հայ պատմագրությանը արևելքի և արևմուտքի միջև», «Հայ մշակութային վերածնունդի վայրերին ժը-ժզ դարերում», «Մխիթարյանների թարգմանական դպրոցին» և այլն, և այլն:

«Դվին. Հայոց մայրաքաղաք Եվրոպայի և Ասիայի միջև».

Հռոմում` «Բրասկի» թանգարանում բացված «Դվին` հայկական մայրաքաղաք Եվրոպայի և Ասիայի միջև» ցուցահանդեսի առթիվ նույնպես տպագրվել է կատալոգ' ցուցանմուշներին համապատասխան բացատրագիր-համառոտագրություններով ու ցուցահանդեսի հայեցակարգով: Կատալոգը տպագրության է պատրաստել Հայաստանի պատմության թանգարանը:

Հրատարակվել է «Հայկական հետքեր Վենետիկում» հայերեն-իտալերեն ժողովածուն, որում համառոտ դրվագված է հայկական ներկայացվածությունը Վենետիկում` միջնադարից ցայսօր. ճարտարապետական հուշարձաններ, եկեղեցիներ, աշխարհիկ շինություններ, կրթամշակութային կենտրոններ, հուշարձաններ, փողոց: Առաջաբանը գրել է արվեստաբան Հրավարդ Հակոբյանը: Այն անդրադարձ է Վենետիկին` որպես հայկական հնագույն գաղթօջախի և հայ տպագրության առաջին կենտրոններից մեկի:

Գրքույկում առանձնահատուկ հոգածությամբ է ներկայացված Մխիթարյան միաբանության, ինչպես նաև Վենետիկի Մուրադ-Ռափայելյան վարժարանի հայանպաստ և հայագիտական գործունեությունը /»INFO ARMENIA» 2011 թ./:

«Սբ. Գրիգոր Լուսավորիչ». Նեապոլի Սուրբ Գրիգոր Լուսավորիչ հայկական եկեղեցու որմնանկարների, փորագրությունների, զարդանախշերի պատկերագիրք, որտեղ հայերեն և իտալերեն բացատրագրերով ներկայացված են Սրբի կյանքը պատկերող դրվագներ: Այս գրքույկը տպագրվել է Հայաստանում Իտալիայի դեսպանության հետ համատեղ: 2010 թ. հոկտեմբերին Երևանում` Իտալիայի դեսպանությունում «Իտալերենի համաշխարհային 10-րդ շաբաթ» ծրագրի շրջանակում կազմակերպված Նեապոլի Սբ Գրիգոր Լուսավորիչ եկեղեցու ֆոտոցուցահանդեսի կապակցությամբ /AREDIT, 2011 թ./:

«Հայաստան-Իտալիա մշակութային համագործակցություն» գրքույկ-տեղեկատու` նվիրված Հայաստան-Իտալիա մշակութային համագործակցության վերջին 5 տարիները ներկայացնող գործընթացներին. իրավապայմանագրային դաշտ, դրամաշնորհային ծրագրեր, տպագրված թարգմանական գրականություն /Երևան, AREDIT, 2011 թ./:

«Վենետիկը` մունջ անուրջ...» բանաստեղծական ժողովածու, որտեղ ընդգրկվել են այն հայ գրողների ստեղծագործությունները, ովքեր ոգեշնչվել և երկեր են նվիրել Վենետիկին. Դանիել Վարուժան, Կոստան Զարյան, Ավետիք Իսահակյան, Եղիշե Չարենց, Շառլ Ազնավուր, Հրանտ Նազարյանց...