Ինչ է պարզվել գինու մասին

Տարածված կարծիքն այն մասին, որ կարմիր գինին ավելի օգտակար է, քան սպիտակը, չի հաստատվել։ Nutrients-ում հրապարակված ուսումնասիրությունը ցույց է տվել, որ գինի խմելը, անկախ դրա տեսակից, չի նվազեցնում քաղցկեղի զարգացման ռիսկը: Գիտնականները վերլուծել են 42 հետազոտություն գրեթե 96 հազար մարդու մասնակցությամբ եւ չեն գտել ապացույցներ, որ կարմիր գինու հակաօքսիդանտները պաշտպանիչ ազդեցություն են ունենում, հաղորդում է Medical Express-ը:

Աշխատանքի հեղինակները նշել են, որ այս վերլուծությունը առաջին խոշոր հետազոտությունն է, որը համեմատում է կարմիր եւ սպիտակ գինու ազդեցությունը ուռուցքային հիվանդությունների հավանականության վրա: Չնայած ընդհանուր առմամբ ռիսկերի տարբերություններ չեն հայտնաբերվել․ պարզվել է, որ սպիտակ գինին կապված է մաշկի քաղցկեղի զարգացման հավանականության մեծացման հետ:

Ենթադրվում է, որ դրա օգտագործումը 22 տոկոսով մեծացնում է մելանոմայի ռիսկը: Նման կապի պատճառները դեռ պարզ չեն։ Հետազոտողները ենթադրում են, որ սա կարող է պայմանավորված լինել ոչ միայն ըմպելիքի քիմիական բաղադրությամբ, այլև վարքի գործոններով: Օրինակ՝ գինու սիրահարները կարող են ավելի հաճախ ենթարկվել ուլտրամանուշակագույն ճառագայթման՝ առանց արևապաշտպան միջոցներ օգտագործելու:

Բացի այդ, կանանց շրջանում ավելի մեծ կապ է հայտնաբերվել սպիտակ գինու օգտագործման և քաղցկեղի զարգացման ընդհանուր ռիսկի միջև, ինչը լրացուցիչ ուսումնասիրության կարիք ունի: Հետազոտողները շեշտում են, որ քաղցկեղի զարգացմանը նպաստող հիմնական գործոնը ցանկացած ալկոհոլի մեջ պարունակվող Էթանոլն է: Մարմնում այն վերածվում է թունավոր միացությունների, որոնք վնասում են ԴՆԹ-ն և սպիտակուցները: