Գյումրիում և Փարաքարում կայանալիք ընտրություններին մասնակցելու ենք անկախ դիտորդի կարգավիճակով. Ավետիք Չալաբյան

«Հայաքվե» ազգային քաղաքացիական միավորումը՝ «Պառլամենտարիզմի զարգացման միջազգային կենտրոն» և «Երիտասարդական ակումբների դաշնություն» ՀԿ–ների հետ համատեղ որոշել է մարտի 30-ին Գյումրիում և Փարաքարում կայանալիք ընտրություններին մասնակցել անկախ դիտորդի կարգավիճակով՝ իրականացնելու ընտրական գործընթացի ամբողջական իրավական վերահսկողություն։ Այս մասին այսօր՝ մարտի 14-ին կայացած ասուլիսի ժամանակ հայտարարեց «Հայաքվե» ազգային քաղաքացիական միավորման համահիմնադիր Ավետիք Չալաբյանը:

«Մաս չենք կազմելու որևէ քաղաքական ուժի կամ դաշինքի նախընտրական ցուցակի, չենք ներգրավվելու քարոզչական աշխատաքներում, փոխարենը հետևողական ենք լինելու ազատ, արդար ու թափանցիկ ընտրությունների անցկացմանը և մեր բոլոր քաղաքացիների ձայների անվերապահ պաշտպանությանը»,–ասաց Ավետիք Չալաբյանը՝ կոչ անելով Գյումրիի և Փարաքարի բնակիչներին ակտիվորեն մասնակցել առաջիկա ընտրություններին և հետևողական լինել դրանց ազատ, արդար և թափանցիկ անցկացմանը։

Ավետիք Չալաբյանը նաև նշեց, որ քաղաքացիները իրենց իրավունքների ոտնահարման ցանկցած դեպքով կարող են զանգահարել  «Հայաքվե» ազգային քաղաքացիական միավորման թեժ գիծ՝ 033–97-82-81 հեռախոսահամարով։

«Մենք հանձն ենք առնում մեր բոլոր քաղաքացիների սահմանադրական իրավունքների լիարժեք իրացմանը»,–ասաց Ավետիք Չալաբյանը։

Նրա խոսքով, նախկինում արձանագրված բազմաթիվ ընտրախախտումները հիմք են տալիս ենթադրելու, որ պրակտիկայում ընտրախախտումների աղետալի ավանդույթը շարունակում է գործել։

«Ընտրական գործընթացը, ցավոք, իր մեջ ունի բազմաթիվ զարտուղիներ՝ քաղաքացու իրական ձայնը աղավաղելու»,–նշեց նա։