Նիկոլ Փաշինյանին պետք է թղթի կտոր, որի վրա ուղղակի խաղաղություն բառը լինի․ Արթուր Խաչատրյան

ԱԺ «Հայաստան» խմբակցության պատգամավոր Արթուր Խաչատրյանը ԱԺ-ում լրագրողների հետ զրույցում երկար ծիծաղեց՝ լսելով, որ իշխանական թևից ասում եմ, որ խաղաղության պայմանագրի տեքստը լավ բանակցված է:

«Ի՞նչ է նշանակում լավ բանակցված փաստաթուղթ է, Հայաստանը առաջարկներ է ներկայացնում, Ադրբեջանը ոչ մի առաջարկի հետ չի համաձայնվում, ինքը պահանջներ է ներկայացնում, այս իշխանությունները համաձայնվում են։ Վերջին երկու կետերը, որ մի քանի ամիս ձգվում էին, Հայաստանը համաձայնվեց հանկարծ։ Այսինքն, եթե այդքան լավ բան էր Ադրբեջանը առաջարկում, բա ինչի՞ էին երկարաձգում, թե վազելով միանգամից համաձայնվեին էլի։ Այսինքն կսկծու փառք Աստծո, հա՞: Սա խայտառակ թուղթ է, Ադրբեջանի բոլոր պահանջները մեջն են, Հայաստանի որևէ խնդրանք, աղերս, աղաչանք, պաղատանք հաշվի առնված չի: Ուրբաթ առավոտյան 4 ժամ Արարատ Միրզոյանը ԱԺ-ում էր, բազմաթիվ անգամ հարցրեցին՝ լավ, մի կետ նշի, որ Հայաստանը առաջադրել է, որի հետ Ադրբեջանը համաձայնվել է։

Այս իշխանությունները մի խնդիր ունեն՝ ցույց տալ, որ իրենք հաջողացել են ապահովել իրենց նախընտրական խոստումը: Իսկ իրենք խոստացել էին խաղաղություն։ Հիմա Նիկոլ Փաշինյանին պետք է թղթի կտոր, որի վրա ուղղակի այդ խաղաղություն բառը լինի, որ գնա ընտրությունների, ասի՝ ժողովուրդ, ես ձեզ խաղաղություն եմ բերել: Նիկոլ Փաշինյանի այդ սխալի պատճառով Հայաստանը կանգնելու է նոր և ավելի աղետալի պատերազմ առաջ: Դա բացառապես ներքաղաքական խնդիր է»,-ասաց նա: