«Արթիկ» ՔԿՀ խցերից մեկում հայտնաբերվել է սավանով կախված կալանավորի դի

«Արթիկ» ՔԿՀ խցերից մեկում 49-ամյա կալանավորին հայտնաբերել են՝ կախված վիճակում, խցում հայտնաբերվել է նաև նամակ։ Այս մասին Euromedia24-ին հայտնեց ՀՀ ԱՆ ՔԿԾ Հանրային կապերի բաժնի պետ Նոնա Նավիկյանը։

«Մարտի 17-ին՝ ժամը 09:05-ի սահմաններում, ՀՀ ԱՆ «Արթիկ» քրեակատարողական հիմնարկի անվտանգության ապահովման բաժնի ծառայողը խցերից մեկում հայտնաբերել է կալանավորված անձ, 1976թ. ծնված Ն. Ա.-ին՝ սավանով կախված վիճակում: Ծառայողը խցում հայտնաբերել է նաև ենթադրաբար կալանավորված անձի կողմից գրված նամակ»,- հայտնեց Նավիկյանը։

Նա հավելեց նաև, որ ՀՀ ՔԿ-ի Շիրակի մարզային քննչական վարչության Արթիկի և Անիի քննչական բաժնում մահվան հանգամանքները պարզելու նպատակով նախապատրաստվում են նյութեր, նշանակվել է դատաբժշկական փորձաքննություն:

Նշենք, որ կախված հայտնաբերված կալանավորը մեղադրվում էր սպանություն կատարելու մեջ։