Խաղաղ օրը պետք է օգտագործենք 100 տոկոսով, որովհետև դա կարող է վաղը չունենանք․ Քոչարյան

Գուցե տարիների ընթացքում Ադրբեջանի ներկայիս նախագահն այնքան է իր մեջ կուտակել, որ հիմա այս հաղթանակից ուզում է լարված վիճակն ավելի տևական դարձնել։ Դա հոգեբանություն է։ Բայց մենք շարժվում ենք խաղաղության օրակարգով, իսկ խաղաղությունը պետք է մեզ բոլորիս, որպեսզի կարողանանք մենք մեր խնդիրները հնրավորինս արագ և որակով լուծել։ Խոսքն առաջին հերթին անվտանգային խնդիրների մասին է։ Այս մասին լրագրողների հետ զրույցում ասաց ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը։

«Անվտանգության միջավայրի մասին խոսելիս չեմ կարող հանրային տիրույթում թվարկել այն ձեռքբերումները, որոնք ունենք, խոսքը ռազմարդյունաբերության, սպասվելիք հաջողությունների տեմպերի մասին է»,– նշեց նա, ապա հավելեց․ «Խաղաղությունը բարդ բան է»։

«Հիմա խաղաղություն է, չէ՞։ Իրենք ասում են կրակում են, բայց ո՛չ իրենց մոտ կրակոց կա, ո՛չ մեր մոտ։ Բայց այդ խաղաղ օրն օգտագործենք ամբողջ 100 տոկոսով, որովհետև այդ խաղաղ օրը կարող է վաղը չունենանք։ Եթե մի բան պետք է անենք, որ մեր անվտանգության բարձիկն ավելի հարստանա, պետք է այսօր անենք, որովհետև վաղը կարող է ուշ լինի։ Պետք չի շատ խոսել, պետք է նվիրումով ու հավատով աշխատել։ Անտարբերությունը շարունակում է մեզ ուղեկցել։ Եթե այդ անտարբերությունը հեռացնենք, ապա մեր լուծվելիք խնդիրներին ավելի կառերեսվենք»,- ասաց Քոչարյանը։