Հայաստանում գողանում են Վրաստանից եկած ֆուտբոլասերների ավտոմեքենաների պետհամարանիշերը. լրագրող (տեսանյութ)

Հաղորդավարուհի, լրագրող Գոհար Հայրապետյանը ֆեյսբուքյան իր էջում հրապարակված կարճ տեսահոլովակով տեղեկացնում է, որ Հայաստանում գողացել են Հայաստան-Վրաստան ֆուտբոլային հանդիպումը դիտելու եկած երկրպագուների մեքենաների պետհամարանիշերը: Վրացական սոցցանցային տիրույթում այս խայտառակությունն այժմ ամենաքննարկվող թեմաներից է, մարդիկ նշում են, որ Հայաստան մուտք գործելուց ժամեր անց գողացել են իրենց մեքենաների պետհամարանիշերը և մեքենայի վրա թելեգրամ-էջի հասցե թողել, որով պահանջում են կապ հաստատել իրենց հետ, վճարել իրենց պահանջած գումարն ու ստանալ դրանք, ասում է Գոհար Հայրապետյանը: Նկատենք, որ առանց պետհամարանիշերի Վրաստանից եկած հյուրերը չեն կարող ետ վերադառնալ:

Նշենք, որ Ներքին գործերի նախարարությունը հերքում է վրացական պետհամարանիշների զանգվածային գողության դեպքերի վերաբերյալ տարածված տեղեկությունները։ 

«Տեղեկությունը չի համապատասխանում իրականությանը։ Մարտի 19-ից սկսած մինչ այս պահը արձանագրվել է վրացական պետհամարանիշի գողության ընդամենը մեկ դեպք՝ Կենտրոն վարչական շրջանում։ Եթե կան քաղաքացիներ, որոնք տուժել են կամ որոնց պետհամարանիշները գողացել են, խնդրում ենք դիմել ոստիկանություն», – հայտնել է ՆԳՆ մամուլի խոսնակ Նարեկ Սարգսյանը։