Գերիների վերադարձը պայմանավորված չէ խաղաղության պայմանագրի ստորագրմամբ, ժամկետներն անկախ են. Սարգիս Խանդանյան

Խաղաղության պայմանագրի ստորագրման շանսը բաց չթողնելու համար Ադրբեջանը պետք է օր առաջ առաջարկի տեղ ու վայր, լրագրողների հետ զրույցում հայտարարեց  ՔՊ-ական պատգամավոր, ԱԺ արտաքին հարաբերությունների հանձնաժողովի նախագահ Սարգիս Խանդանյանը։

Ինչ վերաբերում է ՀՀ Սահմանադրության փոփոխման ադրբեջանական պահանջին՝ նա ասաց, թե դա լեգիտիմ պահանջ չէ։

«Եթե անգամ Հայաստանի Սահմանադրության մեջ լիներ որևէ տարածքային պահանջ որևէ հարևանի նկատմամբ, նույնիսկ այդ պարագայում խաղաղության պայմանագրի տեքստն ամբողջությամբ լուծում է այդ հարցը։ Մենք ենք, որ Ադրբեջանին ասում ենք՝ օր առաջ ստորագրել խաղաղության պայմանագիրը»,- նշեց Խանդանյան։

Նրա խոսքով՝ Սահմանադրության փոփոխությունը Հայաստանի ներքին հարցն է, ու ՔՊ-ն գտնում է, որ նոր Սահմանադրություն ընդունելու անհրաժեշտություն կա։

«Բայց դրա ընդունումը որևէ կապ չունի խաղաղության պայմանագրի բովանդակության հետ»,- նշեց ՔՊ-ականը։

Անդրադառնալով գերիների հարցին՝ Խանդանյանը նշեց, որ խաղաղության գործընթացը շատ լավ միջոց է այդ հարցը լուծելու համար, բայց նաև դա չի նշանակում, որ միայն խաղաղության պայմանագրի ստորագրմամբ է պայմանավորված գերիների վերադարձը։

«Հնարավոր բոլոր դիվանագիտական գործիքակազմն օգտագործվում է դրա համար, ժամկետներն անկախ են, մենք կարծում ենք, որ գերիները հիմա պետք է վերադարձվեն»,-հավելեց Սարգիս Խանդանյանը։