Ինչ-որ վարչապետն ասել է՝ ճիշտ է ասել. Հայկ Կոնջորյան

Երբ որ «դուրսպրծուկ» արտահայտությունը վերաբերվում է մարդկանց, որոնք իրենք դրանից ավելի խիստ տոնայնության բառեր են օգտագործում, ապա այո, դա տեղին է. որովհետև «դուրսպրծուկը» չի հանդիսանում ոչ նորմատիվային բառ: Այս մասին ԱԺ-ում լրագրողների հետ զրույցում նշեց ՔՊ խմբակցության ղեկավար Հայկ Կոնջորյանը՝ անդրադառնալով հիշեցմանը, որ վարչապետ Նիկոլ Փաշինյանն ընդդիմադիրներին «դուրսպրծուկ» անվանեց:

Ինչ վերաբերում է նրան, որ երեկ վարչապետ Նիկոլ Փաշինյանը նախկին երեք նախագահներին դիմելով հայտարարել էր, թե պատերով կտա, ոտի տակ կտա եւ նրանց քաղաքական դիակների մնացորդները դուրս կբերեն, Կոնջորյանն ասաց. «Ես ամբողջությամբ կիսում եմ վարչապետի ամեն ասած տառ, որ երեկ ասել է: Դուք ուղղակի պետք է ուշադրություն դարձնեք երեք նախագահների գրասենյակների, երեք նախագահների քաղաքական համախոհների, երեք նախագահների զավակների, բաջանաղների և մնացած բոլոր փոխկապակցված անձանց բառապաշարները ուղղված առ վարչապետը և ուղղված մեր քաղաքական թիմին, և հետո նոր դիտարկեք վարչապետի ասածը, որպես նաև արձագանք այդ ամեն ինչին։ Եթե իրենք այդքան քաղաքական խիզախություն ունեն, թող գնան բանավեճին մասնակցեն»: