Հերթական կործանարար «բարեփոխումը»․ Անուշ Պողոսյան

Առողջության իրավունք ՀԿ-ի նախագահ Անուշ Պողոսյանն իր ֆեյսբուքյան էջում գրել է․

«Թոքաբանության ազգային կենտրոնում լայնածավալ օպտիմալացման աշխատանքներ են իրականացվում։ 160 մահճակալից օպտիմալացման արդյունքում մնալու է 80-ը, որը ենթադրում է նաև բուժ-անձնակազմի շուրջ 50 տոկոսի կրճատումներ։ Ի դեպ, Թոքաբանության ազգային կենտրոնի բուժանձնակազմը շատ պրոֆեսիոնալ է թե՛ տուբերկուլոզի դեմ պայքարում, և թե՛ այլ թոքաբանական ախտորոշումների բուժման գործում ։ Եվ ՀՀ առողջապահության նախարարությունը փոփոխության է ենթարկում չափորոշիչը, համաձայն որի ակտիվ տուբերկուլյոզով բուժառուները, որոնք համարվում են վարակի փոխանցողներ օդա- կաթիլային ճանապարհով, պետք է բուժվեն տանը, այլ ոչ թե հիվանդանոցում։ Սա նշանակում է, որ այդ բուժառուները վարակելու են մյուսներին, որի արդյունքում տուբերկուլյոզը դառնալու է անկառավարելի և խլելու է բազմաթիվ կյանքեր։ Ի դեպ, արդեն ունենք երեխաների մահվան դեպքեր տուբերկուլյոզից։ Դրան ավելացնենք, որ բազմաթիվ Հնդկաստանի քաղաքացիներ Հայաստան են գալիս արդեն տուբերկուլյոզով և առանց սանիտարական գրքույկի աշխատում սպասարկման ոլորտներում, ապա պատկերը դառնում է ամբողջական։

Հ․Գ․ Առաջարկում եմ ՀՀ առողջապահության նախարարությունը հրապարակել, թե քանի Հնդկաստանի և այլ երկրների քաղաքացիներ են բուժվել Թոքաբանության ազգային կենտրոնում և քանիսն են մահացել տուբերկուլյոզից, որտե՞ղ են բուժվելու, օրինակ, զորակոչիկները (ըստ մեր աղբյուրների, առաջարկում են բուժել զինվորական հոսպիտալներում)․

Հ․Հ․Գ․ Նաև հանրայնացնել , թե ինչպես են վարվելու Թոքաբանության ազգային կենտրոնի շինության հետ․․․․․