Մարտուն Գրիգորյանի նախընտրական շտաբի ներկայացուցիչներն ապօրինի են ձերբակալվել, խախտվել է նրանց քաղաքական իրավունքը. Արսեն Բաբայան

Իրավապաշտպան Արսեն Բաբայանի գնահատմամբ՝ Գյումրու քաղաքապետի թեկնածու Մարտուն Գրիգորյանի նախընտրական շտաբի ներկայացուցիչներն ապօրինի են ձերբակալվել։

«Ձերբակալման այն հիմքը, որ դրել էին 111-րդ հոդվածով, վերաբերում է անձանց կալանքի համար դատարան ներկայացնելուն։  Եթե դու գիտես, որ անձանց կալանքի չես տանելու՝ չես կարող նրանց այլևս  ձերբակալված պահել»,-ասաց Արսեն Բաբայանը՝ նշելով նաև՝ տեղեկություն չունեն, թե երեկվանից որտեղ են պահվում ձերբակալված անձինք։

«Մեր քաղաքը» դաշինքից 4 անձ ձերբակալված է այս պահին, որոնցից մեկը Մարտուն Գրիգորյանի հայրն է, մյուսը՝ որդին։

Արսեն Բաբայանն ասաց նաև, թե երբ քննիչը պահանջում է՝ ձերբակալվածների նկատմամբ կիրառվի վարչական հսկողություն, առաջարկում են, որ այդ քաղաքացիներն ընդհանրապես չշփվեն թեկնածուների հետ, չայցելեն նախընտրական շտաբ.

«Սա քաղաքական իրավունքների խախտում է, որովհետև ձերբակալվածների մեջ կան ավագանու անդամի թեկնածուներ, նախընտրական շտաբի աշխատակիցներ»։