Չեմ ուզենա, որ ժողովրդի մեջքն ու կամքը կոտրելու երևույթը լինի Գյումրիում, այնպես, ինչպես եղավ Վանաձորում. Մամիկոն Ասլանյան

Ես, որ զգայուն ու ցավալի փորձ ունեմ ընտրություններում հաղթելու ու հաղթանակից հետո ճաղերի հետևում հայտնվելու, կարծում եմ՝ այն ինչ կատարվում է Մարտուն Գրիգորյանի նկատմամբ, ուղղակի միտված է ՏԻՄ-ի նկատմամբ անհարգալից վերաբերմունք սերմանելուն, լրագրողների հետ զրույցում ասաց Վանաձարի նախկին քաղաքապետ Մամիկոն Ասլանյանը։

«Այս ամենը միտված է ՏԻՄ ընտրությունների մակարդակը զրոյացնելուն և ՏԻՄ-ին իշխանության, կառավարության կցորդ դաձնելուն։ Եթե հաշվի առնենք այն պարտավորությունները, եվրոպական խարտիաներին մեր ներկայացվածությունն ու ՏԻՄ-ի նկատմամբ իրականացվող այս ռեպրեսիվ երևույթները, ապա դրանք որևէ կերպ համադրելի չեն։ 

Արդեն տարիներ շարունակ ՏԻՄ-ի նկատմամբ իրականացվում է գավառամտությամբ զուգորդված, ապօրինություններով համեմված ձեռագիր, որը միտված է ՏԻՄ-ի նկատմամբ քաղաքացիների վստահության նվազեցմանը»,-ասաց Մամիկոն Ասլանյանը։ 

Նա ասաց, թե իշխանությունն այս գործառույթն իրականացնում է ՏԻՄ-երի նկատմամբ, որպեսզի հետագայում համապետական գործընթացների ժամանակ կիրառի այդ սկզբունքը և ցույց տա, որ ժողովրդի քվեն որևէ նշանակություն չունի.

«Ուզում են ցույց տալ, որ մարզերում ժողովուրդն ընդամենը գավառական ժողովուրդ է, որը քաղաքագիտական կանոնների մեջ չի տեղավորվում»։

Մամիկոն Ասլանյանի գնահատմամբ՝ Գյումրիում ընդդիմությունը հավաքական առումով կհաղթի.

«Թե դա ինչքանով կնյութականանա քաղաքի կառավարման մեջ՝ այս պահին չեմ կարող ասել։ Իշխանությունների մոտ նկատում եմ մոլուցք ամեն գնով կառավարման ղեկը խլելու՝ շատ բիրտ, ապօրինի մեթոդներով։ Գուշակել չեմ կարող, թե ինչ կլինի, բայց երբեք չեմ ուզենա Վանաձորի նախադեպը կրկնվի։ Գյումրին ինձ համար հարազատ քաղաք է, չեմ ուզենա, որ ժողովրդի մեջքն ու կամքը կոտրելու երևույթը լինի այստեղ, ինչպես եղավ Վանաձորում»,-ասաց Ասլանյանը։