Քննիչը չի կարողացել ներկայացնել որևէ փաստ, որ Մարտուն Գրիգորյանի հայրը հանցանք է գործել (տեսանյութ)

Ունեցանք խայտառակ դատական նիստ, քննիչը հրաժարվեց պատասխանել պաշտպանական կողմի հարցերին, մինչդեռ դա իր պարտականությունն է, հայտարարեց, որ հրաժարվում է պատասխանել հարցերին, և այդ հրաժարումը պայմանավորված էր այն հանգամանքով, որ նա չկարողացավ ներկայացնել որևէ փաստական հանգամանք, որով հաղթահարված կլիներ հիմնավոր կասկածի շեմը, որ Գյումրիի քաղաքապետի թեկնածու Մարտուն Գրիգորյանի հայրը՝ Կամո Գրիգորյանը, հանցանք է գործել: Այս մասին Հակակոռուպցիոն դատարանում Կամո Գրիգորյանի գործով տեղի ունեցած դատական նիստից հետո լրագրողների հետ զրույցում հայտարարեց պաշտպան Արսեն Բաբայանը:

Նշենք, որ ավելի ուշ Կամո Գրիգորյանն ազատ արձակվեց դատարանի դահլիճից: Մինչ այդ ազատ էր արձակվել նաև Մարտուն Գրիգորյանի որդին՝ երեկ ձերբակալված Կարեն Գրիգորյանը, որի նկատմամբ դատարանը վարչական հսկողություն է սահմանել հետևյալ սահմանափակումներով՝ չշփվել վարույթով անցնող մարդկանց հետ և 20:00-08:00-ն մնալ տանը:

Հիշեցնենք, որ մարտի 27-ի առավոտյան Գյումրիի ավագանու արտահերթ ընտրություններին մասնակցող «Մայր Հայաստան», «Մեր Քաղաքը» ընդդիմադիր ուժերի նախընտրական շտաբներում, տներում, գրասենյակներում խուզարկություններ էին սկսվել, որոնց հաջորդեցին ձերբակալություններ: Ձերբակալվել էին «Մեր քաղաքը» դաշինքի կողմից Գյումրու քաղաքապետի թեկնածու առաջադրված Մարտուն Գրիգորյանի հայրն ու որդին, որոնց Գյումրիից տեղափոխել  էին Երևան՝ Հակակոռուպցիոն կոմիտե: