Մշակութային ժառանգություն և նորարարություն. հայկական գորգագործությունից մինչև արհեստական բանականություն

«Ավանդույթ և արդիականություն» կազմակերպության կողմից կյանքի է կոչվել մի նախագիծ՝ նվիրված հայկական մշակութային ժառանգությանը։ Մեգերյան Կարպետ ընկերության տարածքում իրականացված նախաձեռնությունը միավորել է անցյալն ու ապագան՝ ներգրավելով երեխաներին հայկական գորգագործության և նորարարական տեխնոլոգիաների ուսումնասիրության մեջ։

Ծրագրի ընթացքում երեխաները սովորել են գորգագործության գաղտնիքները, մասնակցել գորգերի ստեղծմանը և գորգի խուզից թաղիք պատրաստելուն, որն օգտագործվել է կիրառական իրեր ստեղծելու համար։ Այս ամենը կատարվել է փորձառու վարպետների աջակցությամբ, ինչը թույլ է տվել երեխաներին խորապես կապվել այս հին արվեստի հետ։ Դասախոսները ստեղծել են կրթական միջավայր, որտեղ երեխաները ծանոթացել են հայկական մշակութային ժառանգությանը՝ սովորելով գորգանախշեր և ստեղծելով դեկորատիվ աշխատանքներ՝ օգտագործելով արհեստական բանականության գործիքներ։ Սա նրանց հնարավորություն է տվել իրենց ստեղծագործ մտքերն ու երևակայությունները վերածելու իրականության։

Նախագիծն ավարտվել է ցուցահանդեսով, որտեղ ներկա են եղել ինչպես երեխաների ծնողները, այնպես էլ Մեգերյան Կարպետ ընկերության հյուրերն ու զբոսաշրջիկները։ Բոլորը հիացմունքով դիտել են, թե ինչպես են հայ երեխաները համադրում ավանդույթն ու նորարարությունը՝ ստեղծելով եզակի աշխատանքներ։

Այս նախագիծը իրականացվել է ՀՀ Կրթության, գիտության, մշակույթի և սպորտի նախարարության աջակցությամբ և ֆինանսավորմամբ։ Նման նախաձեռնությունները կարևոր են մշակութային ժառանգության սերնդեսերունդ փոխանցման համար։ Շուտով կմեկնարկի նոր փուլ, որի ընթացքում պատանիները կշարունակեն ուսումնասիրել հայկական ժառանգությունը՝ համադրելով դեկորատիվ-կիրառական արվեստը և արհեստական բանականության գործիքները։