Իրանն իր մտահոգությունները կփոխանցի հայկական կողմին․ խորհրդակցություններ կանցկացվեն

Իրանի ԱԳՆ խոսնակ Էսմայիլ Բաղային մամուլի ասուլիսի ժամանակ հայտնել է, որ Հայաստանն ու Իրանը այսօր և վաղը խորհրդակցություններ կանցկացնեն։

Նա, մասնավորապես, նշել է. «Մենք բարձր ենք գնահատում բարեկամական հարաբերությունները՝ հիմնված բարիդրացիության և փոխադարձ շահերի վրա, և, բնականաբար, տարածաշրջանային զարգացման հարցերում, հատկապես այն դեպքերում, որոնք ուղղակիորեն կամ անուղղակիորեն ազդում են Իրանի վրա, կապ ենք պահպանում այդ երկրների հետ։

Մեր քննարկումները Հայաստանի հետ խաղաղության համաձայնագրի կնքման վերաբերյալ սկսվել են վաղուց և նորություն չեն։ Նախորդ քննարկումների ժամանակ մենք կոչ ենք արել կողմերին արագացնել խաղաղության համաձայնագրի ստորագրումը, քանի որ կարծում ենք՝ այս համաձայնագիրը կարող է շրջադարձային կետ լինել Կովկասում խաղաղության և կայունության ամրապնդման համար։

Այսօր և վաղը նույնպես բարձր մակարդակի խորհրդակցություններ կանցկացվեն Իրանի և Հայաստանի պաշտոնյաների միջև՝ ոչ միայն իրադարձությունների վերաբերյալ ավելի ճշգրիտ տեղեկություն ստանալու, այլև մեր դիտարկումներն ու մտահոգությունները հայկական կողմին փոխանցելու համար»։