Իրանը ուշադիր հետևում է Կովկասում տեղի ունեցող զարգացումներին․ ԱԳՆ խոսնակ

Մենք ուշադիր հետևում ենք Կովկասում տեղի ունեցող զարգացումներին և չենք պարզեցնում կամ թերագնահատում որևէ հարց։ Այս մասին հայտարարել է Իրանի արտաքին գործերի նախարարության խոսնակ Էսմայիլ Բաղային։

«Հարավային Կովկասը մեծ նշանակություն ունի մեր և տարածաշրջանի պետությունների, մասնավորապես Ռուսաստանի համար՝ քաղաքական, տնտեսական և աշխարհաքաղաքական առումներով», - ասել է նա։

Արտգործնախարարության խոսնակը, մատնանշելով իրանական կողմի համար երկրի հյուսիս-արևմուտքում տեղի ունեցող իրադարձությունների կարևորությունը, ասել է, որ Թեհրանը ուշադիր հետևում է զարգացումներին։ Նա ընդգծել է, որ Իրանի իշխանությունները թույլ չեն տա որևէ հարցի պարզեցում կամ թերագնահատում։

Բաղային արտատարածաշրջանային ուժերի միջամտությունը անվանել է Իրանի համար «կարմիր գիծ» և ասել, որ Թեհրանը ոչ մի կերպ արտաքին միջամտությունը և արտատարածաշրջանային ուժերի ներկայությունը օգտակար չի համարում։ Նրա խոսքով՝ Իրանը համոզված է, որ դա հանգեցնում է աշխարհաքաղաքական բարդությունների։