Նավթի գները աճել են Թրամփի խորհրդականի հայտարարությունից հետո

ԱՄՆ նախագահի խորհրդական Փիթեր Նավարոյի հայտարարությունը Ռուսաստանի նավթի հոսքերի մասին դեպի Հնդկաստան կտրուկ բարձրացրեց նավթի գները, գրում է Reuters-ը։

Նավարոն նշել էր, որ Հնդկաստանի կողմից ռուսական նավթի գնումը Մոսկվային հնարավորություն է տալիս շարունակել պատերազմը Ուկրաինայում։ Նրա խոսքերից հետո Brent տեսակի նավթի ֆյուչերսները բարձրացան 20 ցենտով (0,3%)՝ հասնելով 66,05 դոլարի մեկ բարելի դիմաց։ Ամերիկյան West Texas Intermediate տեսակի նավթը նույնպես աճեց 28 ցենտով (0,45%)՝ հասնելով 63,08 դոլարի։

Փորձագետները շեշտում են, որ Նավարոյի կոշտ հայտարարությունը Հնդկաստանի ներմուծման մասին, ինչպես նաև առևտրային բանակցությունների ձգձգումը, վերստին բարձրացրել են էներգետիկ շուկայի լարվածությունը։ Նավարոն ընդգծել է, որ եթե Հնդկաստանը ցանկանում է մնալ ԱՄՆ-ի ռազմավարական գործընկեր, պետք է փոխի իր վարքագիծը․ ըստ նրա՝ երկիրը ռուսական նավթը գնում է մեծ զեղչերով, վերամշակում և վաճառում Եվրոպա, Աֆրիկա և Ասիա։ Թրամփի վարչակազմը, ըստ Նավարոյի, պատրաստվում է դադարեցնել այս պրակտիկան։