Ատոմային թափոնները նոր կիրառություն են գտնում

Տրիտիումը, որը ապագա ջերմամիջուկային էլեկտրակայանների հիմնական վառելիքներից մեկն է, ներկայումս հազվագյուտ և չափազանց թանկ իզոտոպ է. դրա արժեքը հասնում է 33 միլիոն դոլարի մեկ կիլոգրամի համար: Լոս Ալամոսի ազգային լաբորատորիայի ֆիզիկոս Թերենս Տարնովսկին առաջարկել է տրիտիում ստանալու համար օգտագործել առկա միջուկային թափոնները, հաղորդում է Ամերիկյան քիմիական ընկերությունը (ACS):

Գիտնականի խոսքով՝ աշխարհում կա ընդամենը մոտ 25 կգ տրիտիում, որը բավարար կլիներ մոտ 500,000 տուն վեց ամսվա ընթացքում էլեկտրաէներգիայով ապահովելու համար։ Ներկայումս հիմնական մատակարարը Կանադան է, որտեղ իզոտոպն արտադրվում է գործող ատոմակայաններում։ Սակայն արտաքին աղբյուրներից կախվածությունը և չափազանց սահմանափակ ծավալները ջերմամիջուկային էներգիայի լայնածավալ ներդրման հեռանկարը դարձնում են անորոշ։

«Էներգետիկ անցումները միշտ թանկ են, և պետք է դիտարկել ցանկացած լուծում, որը կարող է կրճատել ծախսերը», - ասել է Տարնովսկին։ Նա հավելել է, որ հաջորդ քայլը կայանի արդյունավետության կատարելագործումն ու դրա տնտեսական նպատակահարմարության հաշվարկն է։

Գիտնականը կարծում է, որ ապագայում նման տեխնոլոգիան միաժամանակ կլուծի ռադիոակտիվ թափոնների թանկարժեք պահեստավորման խնդիրը և կստեղծի ջերմամիջուկային ռեակտորների համար վառելիքի հուսալի աղբյուր։