Մեկնարկել են «Տնտեսապես կայուն ընտանիքներ» նախաձեռնության մշտադիտարկման այցերը

«Իմ քայլը» հիմնադրամը մեկնարկել է «Տնտեսապես կայուն ընտանիքներ» նախաձեռնության մշտադիտարկման այցերը։ Առաջինը Արագածոտնի մարզի հինգ բնակավայրերն էին՝ Վարդենուտ, Շենավան, Ծաղկաշեն, Շղարշիկ և Ագարակ։

Ինչպես տեղեկացրին «Իմ քայլը» հիմնադրամից, այցերի ընթացքում հիմնադրամի ներկայացուցիչները ծանոթացել են շահառուների ջերմատնային տնտեսություններին, բերքատվությանը։

«Նախաձեռնության ղեկավար Թագուհի Միրզախանյանն ուրախությամբ արձանագրեց, որ աճեցված բերքը ոչ միայն օգտագործվում է շահառուների սեփական կարիքների համար, այլև իրացվում է տեղական շուկաներում։

Շենավանում բնակվող Սպարտակ Աղասյանը նշեց, որ հաջորդ տարի նախատեսում է ծաղիկների մշակումից անցում կատարել բանջարաբոստանային մշակաբույսերի արտադրության։ Իսկ ծրագրի մեկ այլ շահառու Նարինե Մաթևոսյանն ընդգծեց. «Քանի որ այս ծրագիրը մեծ հնարավորություն է տալիս գյուղատնտեսությամբ զբաղվել, շատ կցանկանայի, որ տարբեր մարզերում այս ծրագիրը լիներ, և շատ մարդիկ օգտվեին ու ստանային հենց իրենց բերքը` առողջ ու օրգանիկ»։

Նախաձեռնությունը նպատակ ունի աջակցել 2023թ․-ին Լեռնային Ղարաբաղից բռնի տեղահանված ընտանիքներին՝ զարգացնելով նրանց գյուղատնտեսական կարողություններն ու բիզնես մտածելակերպը, նպաստելով համայնքներում ինտեգրմանը և ՀՀ-ում մշտական հաստատմանը»,- ասվում է հաղորդագրության մեջ։

Նշվում է, որ Կիպրոսի կառավարության դրամաշնորհի միջոցով հիմնադրամը Արագածոտնի և Լոռու մարզերի յոթ համայնքներում մշտապես բնակություն հաստատած 20 ընտանիքի տրամադրել է 250 քմ մակերեսով կահավորված ջերմատներ, ինչպես նաև անհրաժեշտ սերմեր ու սածիլներ։

Հիմնադրամից հայտնում են, որ մշտադիտարկման այցերը շարունակական բնույթ են կրելու։