Մենք ահաբեկչության կողմնակից չենք եղել, չենք եւ չենք լինելու․ Գերմանիայի հայոց թեմի առաջնորդ

«Մեր Տերը՝ Հիսուս Քրիստոս, կոչվում է Խաղաղության Իշխան։ Ի՞նչ է նշանակում՝ եկեղեցին խաղաղությանը դեմ է. այդպիսի բան գոյություն չունի»,- հայտարարել է Գերմանիայի հայոց թեմի առաջնորդ Տեր Սերովբե եպիսկոպոս Իսախանյանը։

Նա ընդգծել է, որ հայ եկեղեցին դատապարտում է ցանկացած ահաբեկչական դրսեւորում և  Եկեղեցում ամեն քայլափոխի խաղաղության աղոթք է հնչեցնում։ «Մենք, այո՛, այնպիսի աշխարհաքաղաքական իրավիճակում ենք գտնվում, եւ կարծում եմ՝ յուրաքանչյուր հայ ձգտում է, ուզում է խաղաղություն, իսկ Եկեղեցին առավել եւս աղոթում է խաղաղության համար։ Մեր Պատարագի սկզբից մինչեւ վերջ ամեն քայլափոխի խաղաղության աղոթք է հնչում։ Մենք, բնական է, կողմ ենք խաղաղությանը։ Հայ Եկեղեցին դատապարտում է ցանկացած ահաբեկչական դրսեւորում՝ ո՛վ էլ որ դա կազմակերպած լինի»։

«Ինչ-որ մենք ասում ենք՝ մեր երկու հոգեւոր եղբայրների անմեղության կանխավարկածը հարգվի եւ արդար դատավարություն տեղի ունենա։ Ես չեմ կարծում, չեմ հավատում, չեմ ուզում հավատալ, որ իմ հոգեւոր եղբայրը երբեւէ կարող էր ահաբեկչական նպատակներ հետապնդել։ Եվ սպասում եմ, որ առանց դատարանի որոշման նրանք չնախադատվեն, այլ հարգվի այդ մարդկանց՝ մեր հոգեւոր եղբայրների անմեղության կանխավարկածը, տեղի ունենա արդար դատավարություն։ Մենք երբեք եւ երբեք ո՛չ օտարի, ո՛չ էլ աշխարհում որեւէ տեղ ահաբեկչության կողմնակից չենք եղել, չենք եւ չենք լինելու»,- նշել է Տեր Սերովբե եպիսկոպոս Իսախանյանը։