ԱՄՆ-ում աճել է առանձնատների շինարարությունը և նոր թույլտվությունների քանակը

ԱՄՆ-ում հուլիսին աճել է նոր առանձնատների շինարարությունը և տրվել է ավելի շատ շինթույլտվություն՝ չնայած բարձր հիպոթեքային տոկոսադրույքներին և տնտեսական անորոշությանը, գրում է Reuters-ը։

ԱՄՆ առևտրի նախարարության տվյալներով՝ առանձնատների շինարարությունը, որը կազմում է բնակարանաշինության հիմնական մասը, հուլիսին աճել է 2,8%-ով՝ հասնելով տարեկան 939 հազար միավորի։ Նոր առանձնատների շինթույլտվությունները նույնպես աճել են 0,5%-ով՝ հասնելով տարեկան 870 հազար միավորի։ Ընդհանուր բնակարանային շինարարությունը (ներառյալ բազմաբնակարան շենքերը) աճել է 5,2%-ով՝ հասնելով 1,428 միլիոն միավորի, մինչդեռ տրված ընդհանուր թույլտվությունները նվազել են 2,8%-ով և կազմել 1,354 միլիոն։

Բարձր տոկոսադրույքները շարունակում են սահմանափակել պահանջարկը, սակայն վերջին շաբաթներին որոշակի անկում է գրանցվել․ 30-ամյա ֆիքսված հիպոթեքի միջին տոկոսադրույքը նվազել է մինչև 6,58%՝ ամենացածր ցուցանիշը հոկտեմբերից։ Այնուամենայնիվ, շուկան շարունակում է մնալ ճնշված․ բարձր գները և պահանջարկի անկումը ստիպում են շինարարներին դանդաղեցնել նոր նախագծերի մեկնարկը։ Բնակարանային ներդրումները, ներառյալ շինարարությունը, ԱՄՆ տնտեսության աճի վրա շարունակել են բացասական ազդեցություն ունենալ տարվա առաջին երկու եռամսյակներում։