Տնային պայմաններում կարտոֆիլ աճեցնելը կարող է լուծել պահանջարկի մի մասը

Ռուս տնտեսագետ Զալինա Կազովան «Газета.Ru»-ի հետ զրույցում նշել է, որ կարտոֆիլի արտադրությունը երկրում տարեկան պետք է ավելանա առնվազն 4,5–6 տոկոսով։ Նրա խոսքով՝ բնակարաններում կարտոֆիլ աճեցնելը կարող է մինչև 8–10 տոկոսով բարձրացնել բնակչության ապահովվածությունը։

Նա այսպես է մեկնաբանել ռուս գիտնականների նոր մեթոդի մշակման մասին լուրը, որը թույլ է տալիս տնային պայմաններում առանց թանկարժեք քիմիկատների և հատուկ սարքավորումների արագ ու հեշտ աճեցնել կարտոֆիլի արժեքավոր տեսակները։ Նոր տեխնոլոգիան հնարավորություն է տալիս ստանալ էկոլոգիապես մաքուր բերք ամբողջ տարվա ընթացքում։

Կազովայի հաշվարկներով՝ միջինում չորս հոգանոց ընտանիքը, վեց քառակուսի մետր մակերեսում կարտոֆիլ աճեցնելով, կարող է ստանալ մինչև 240 կիլոգրամ բերք։ Ընդհանուր առմամբ այս մեթոդը կարող է ապահովել շուրջ 550 հազար ընտանիքի՝ ավելի քան 132 միլիոն կիլոգրամ կարտոֆիլով։ Միևնույն ժամանակ տնտեսագետը շեշտել է, որ այս եղանակը չի կարող զգալիորեն փոխել գների մակարդակը՝ բերքատվության նվազման և ներմուծման աճի պատճառով։