Ելցին-կենտրոնի փոխղեկի դեմ գործ հարուցվեց Ելցինի դստեր գրառումը տարածելու համար

ՌԴ-ում վարչական գործ է հարուցվել Ելցին-կենտրոնի առաջին փոխղեկ Լյուդմիլա Տելենի դեմ՝ բանակը վարկաբեկելու մեղադրանքով։ Պատճառը դարձել է նրա կողմից 2022-ին Facebook-ում (ՌԴ-ում արգելված հարթակ) արված ռեպոստը՝ Բորիս Ելցինի դուստր Տատյանա Յումաշևայի հակապատերազմական գրառման։ Այս մասին հայտնել է Տելենի փաստաբան Միխայիլ Բիրյուկովը։

Ըստ փաստաբանի, գրառումը հրապարակվել է 2022 թվականի փետրվարի 25-ին, իսկ գործը դատարան է փոխանցվել այս տարվա օգոստոսին։ Մինչ այդ, Տելեն բացահայտ կերպով քննադատել էր «Россия 24» և «УралLIVE» հեռուստաալիքներին՝ իր իսրայելական անձնագրի սկանը հրապարակելու համար, որտեղ երևում էին անձնական տվյալները։

Եկատերինբուրգի Վերխ-Իսետսկի դատարանը արդեն սկսել է գործի քննությունը, սակայն Տելեն նիստին չի ներկայացել։ Նրա պաշտպանն ընդգծել է, որ ռեպոստը արվել է Մոսկվայում, և գործը պետք է քննվի հենց մայրաքաղաքում։ Ավելի վաղ հաղորդվել էր, որ մոսկովյան կոմունիստները պահանջել էին փակել Ելցին-կենտրոնը՝ «պատմական կեղծիքների տարածման» մեղադրանքով։