Նիդերլանդները Patriot ՀՕՊ համակարգեր կտեղակայեն Լեհաստանում

Լեհաստանի պաշտպանության նախարար Վլադիսլավ Կոսինյակ-Կամիշը հայտնել է, որ Նիդերլանդները Լեհաստան կուղարկեն երկու Patriot ՀՕՊ համակարգ և շուրջ 300 զինծառայող՝ պաշտպանելու համար Ուկրաինա ռազմական օգնության մատակարարման լոգիստիկ հանգույցը։ Որոշումն ընդունվել է Ուկրաինայի պատերազմի և Լեհաստանի տարածքում աճող անվտանգային ռիսկերից ելնելով։

Նիդերլանդները հայտարարել է, որ համակարգերը կտեղակայվեն դեկտեմբերի 1-ից մինչև հաջորդ տարվա հունիսի 1-ը։ Լեհաստանը, որը դարձել է Կիևին օգնություն տրամադրող հիմնական տրանսպորտային ուղին, հատկապես մտահոգվել է այս շաբաթվա միջադեպից հետո, երբ ռուսական արտադրության ԱԹՍ ընկել էր երկրի արևելքում գտնվող մի դաշտում՝ վնասելով բերքը և տան ապակիներ։

Լեհ դատախազությունը նշել է, որ ԱԹՍ-ն, ամենայն հավանականությամբ, ներթափանցել էր Բելառուսի տարածքից՝ Մոսկվայի սերտ դաշնակիցից, որն աջակցում է Ռուսաստանի պատերազմին Ուկրաինայում։ Դեպքը խորացրել է լարվածությունը՝ տարածաշրջանում պատերազմի ֆոնին։