Գտնվել է արագ և անվտանգ քաշի կորստի բնական միջոց

Չինացի հետազոտողները ստեղծել են ուտելի միկրոսֆերներ՝ հիմնված կանաչ թեյի, E վիտամինի և ջրիմուռների վրա, որոնք կանխում են ճարպերի կլանումը աղիքներում: Առնետների վրա կատարված առաջին փորձարկումները ցույց են տվել, որ քաշի կորստի նոր մոտեցումը կարող է լինել ավելի անվտանգ այլընտրանք վիրահատություններին կամ դեղորայքին, հաղորդում է Ամերիկյան քիմիական ընկերությունը (ACS):

Գիրության դեմ պայքարի առկա մեթոդները հաճախ կապված են ռիսկերի հետ: Օրինակ՝ բարիատրիկ վիրահատությունը համարվում է արդյունավետ, բայց ինվազիվ միջամտություն է: Դեղամիջոցները նվազեցնում են ճարպերի կլանումը, բայց կարող են առաջացնել լուրջ կողմնակի ազդեցություններ, այդ թվում՝ լյարդի և երիկամների վնասում:

Նման խնդիրներից խուսափելու համար թիմը սինթեզել է բուսական միկրոսֆերներ. կանաչ թեյի պոլիֆենոլները և E վիտամինը կազմում են միջուկ, որը կապում է ճարպի մոլեկուլները, իսկ ջրիմուռներից ստացված պոլիմերը պաշտպանում է կառուցվածքը ստամոքսի թթվային միջավայրում քայքայումից: Աղիքներում հայտնվելուց հետո գնդերը լայնանում են և սկսում են «որսալ» ճարպերը՝ դրանք բնականաբար հեռացնելով մարմնից:

«Մեր միկրոսֆերները գործում են անմիջապես աղիքներում՝ մեղմ և ոչ ինվազիվ եղանակով խոչընդոտելով ճարպերի կլանումը», - բացատրեց Սիչուանի համալսարանի դոկտորանտ Յուե Վուն:

Երբ փորձարկումները կատարվել են բարձր ճարպային սննդակարգի ենթարկված առնետների վրա (կալորիականությունների 60%-ը՝ ճարպից), միկրոսֆերաներ ստացած կենդանիները մեկ ամսվա ընթացքում կորցրել են իրենց մարմնի քաշի մոտ 17%-ը։ Նրանց մոտ ճարպային հյուսվածքի և լյարդի վնասվածքը նվազել է, իսկ կղանքի հետ արտազատվող ճարպի քանակը մեծացել է։ Միևնույն ժամանակ, առնետների մոտ կողմնակի ազդեցություններ չեն նկատվել։

Գիտնականներն արդեն սկսել են համագործակցել կենսատեխնոլոգիական ընկերության հետ՝ միկրոսֆերաները մեծ մասշտաբով արտադրելու համար և սկսել են կլինիկական փորձարկում, որին մասնակցել է 26 մարդ։

Հեղինակների խոսքով՝ մարդկանց վրա փորձարկումների առաջին արդյունքները կարող են հայտնվել մեկ տարվա ընթացքում։ Եթե տեխնոլոգիան ապացուցվի արդյունավետ և անվտանգ, միկրոսֆերաները կարող են թողարկվել որպես սովորական սննդի հավելումներ։

Թարգմանությունը՝ Lurer.com-ի