Nike-ը մարտահրավեր է նետում Hoka-ին ու Salomon-ին՝ Չինաստանի աճող շուկայում

Ամերիկյան սպորտային հագուստի հսկա Nike-ը պատրաստվում է ուժեղացնել ներկայությունը բացօթյա սպորտի շուկայում՝ Չինաստանում արագ աճող սեգմենտում։ Ընկերությունը ներկայացնում է նոր trail-running կոշիկ ACG Ultrafly, որը պաշտոնապես կցուցադրվի Ֆրանսիայում անցկացվող Ultra-Trail du Mont-Blanc մրցավազքում։

Այս քայլով Nike-ը փորձում է վերատեղադրել իր ACG ենթաբրենդը՝ որպես լուրջ խաղացող լեռնավազքի և բացօթյա սպորտի ոլորտում։ Վերլուծաբանները նշում են, որ ընկերությունը փորձում է հետ բերել դիրքերը, որոնք վերջին տարիներին կորցրել է մրցակիցների՝ Salomon-ի և Hoka-ի առաջընթացի պատճառով։ Միևնույն ժամանակ, Չինաստանում Nike-ի վաճառքները երեք եռամսյակ անընդմեջ արձանագրել են երկնիշ անկում՝ չնայած այն բանին, որ երկրում բացօթյա հագուստի և կոշիկի պահանջարկը գրեթե կրկնապատկվել է 2019-ից ի վեր։

Ընկերության նոր ռազմավարությունը ղեկավարում է Անջելա Դոնգը, ով պատասխանատու է Nike-ի գործունեության համար ամբողջ Մեծ Չինաստանում։ Ըստ Euromonitor-ի՝ ընկերության գլոբալ մասնաբաժինը 2021-ի 29%-ից նվազել է մինչև 26%, ինչը պայմանավորված է Չինաստանում մրցակցության սրացմամբ և տնտեսական դժվարություններով։ Մասնագետների կարծիքով՝ ACG բրենդի վերագործարկումը կարող է Nike-ի համար դառնալ երկարաժամկետ խաղ՝ 1,3 միլիարդ սպառողներին ներգրավելու նպատակով։