Intel-ը զգուշացնում է․ ԱՄՆ-ի բաժնեմասը կարող է վնասել արտասահմանյան վաճառքներին և ապագա սուբսիդիաներին

Intel ընկերությունը հայտարարել է, որ ԱՄՆ կառավարության 9,9% բաժնեմասը ընկերությունում կարող է վտանգել նրա բիզնեսը՝ սկսած միջազգային վաճառքներից մինչև ապագա պետական դրամաշնորհների ստացման հնարավորությունը։

Ընկերության ներկայացրած փաստաթղթերում նշվում է, որ ռիսկերը կապված են այն փաստի հետ, որ կառավարությունը որոշել է 11 միլիարդ դոլարի դրամաշնորհները փոխարկել բաժնետոմսերի, ինչը նախագահ Դոնալդ Թրամփի հերթական միջամտությունն է ամերիկյան կորպորատիվ ոլորտում։

Intel-ի գլխավոր տնօրեն Լիփ-Բու Թանը, սակայն, հայտարարեց․ «Ինձ դրամաշնորհ պետք չէր, բայց ուրախ եմ, որ ԱՄՆ կառավարությունը դառնում է մեր բաժնետերը»։

Միևնույն ժամանակ ընկերությունը զգուշացնում է, որ այս քայլը կարող է խոչընդոտել ապագա դրամաշնորհներին կամ ստիպել այլ կառավարություններին նույնպես պահանջել դրամաշնորհների փոխարկում բաժնեմասի։ Բացի այդ, ԱՄՆ կառավարության խոշոր բաժնեմասը կարող է սահմանափակումներ առաջացնել ընկերության միջազգային գործունեության վրա՝ հատկապես օտարերկրյա սուբսիդիաների մասին օրենքների շրջանակում։

Intel-ի վաճառքների 76%-ը անցյալ տարի եղել է ԱՄՆ-ից դուրս, որից 29%-ը՝ Չինաստանից։ Ընկերությունը նաև հայտնել է, որ նոր թողարկվող բաժնետոմսերը կնոսրացնեն գործող ներդրողների փայաբաժինը, քանի որ դրանք վաճառվում են շուկայական արժեքից 4 դոլար ավելի ցածր գնով։

Չնայած մտահոգություններին, երկուշաբթի առավոտյան Intel-ի բաժնետոմսերը աճել են 2%-ով՝ հասնելով $25,25-ի։