Նախագիծը կամրապնդի Թուրքիայի, Ադրբեջանի և Հայաստանի միջև տնտեսական համագործակցությունը․ Էրդողան

Թուրքիայի նախագահ Ռեջեփ Թայիփ Էրդողանը հայտարարել է Կարս-Իգդիր-Արալըք-Դիլուջու երկաթուղու շինարարության մեկնարկի մասին, որը, ըստ թուրքական լրատվամիջոցների, կլինի «Զանգեզուրի միջանցքի» առանցքային տարրը։ Իր հայտարարության մեջ թուրք նախագահը ընդգծել է, թե նախագիծը ռազմավարական նշանակություն ունի Հարավային Կովկասի համար և կդառնա «խաղաղության նախագիծ» տարածաշրջանի համար։

Էրդողանը նշել է, թե 2.4 միլիարդ եվրո արժողությամբ գծի գործարկումը կբարձրացնի Չինաստանից Մեծ Բրիտանիա միջազգային առևտրային ուղու արդյունավետությունը։ Նախագիծը կմիացնի Կասպից և Միջերկրական ծովերի ավազանները, ինչը զգալիորեն կամրապնդի Թուրքիայի արևելյան և հարավարևելյան շրջանների արտադրական և արտահանման հնարավորությունները, ինչպես նաև կբարելավի տրանսպորտային ենթակառուցվածքները։

«Նախագծի բոլոր տարրերի իրականացմամբ Թուրքիայի, Ադրբեջանի և Հայաստանի միջև տնտեսական համագործակցությունը կստանա նոր չափ», - ասել է Էրդողանը՝ հավելելով, որ նախագծի ավարտը հզոր խթան կհաղորդի տարածաշրջանային զարգացմանը։