ԱՄՆ-ում բորտուղեկցուհին ապտակել է ուղևորին «Պաղեստին» գրությամբ շապիկի պատճառով

Delta Airlines-ի բորտուղեկցուհին ԱՄՆ-ում թռիչքի ընթացքում ապտակել է ուղևորին և վիրավորել նրան։ Ինչպես հայտնում է The New York Post-ը, միջադեպը տեղի է ունեցել հուլիսի 29-ին, սակայն դրա մանրամասները հայտնի են դարձել միայն օգոստոսի 26-ին։

Ուղևոր Մոհամմադ Շիբլին, ով երկու երեխաների հայր է, կնոջ հետ թռչում էր Ատլանտայից դեպի Ֆրեսնո։ Նրա խոսքով՝ բորտուղեկցուհին սկզբում հրաժարվել է սպասարկել իր կնոջը, այնուհետև նաև նրան ջուր չի տվել։ Շիբլին դատարանում հայտարարեց, որ աշխատակիցը կանխամտածված սադրել է իրեն՝ կնոջ «Պաղեստին» գրությամբ շապիկի պատճառով։

Նրա խոսքով՝ բորտուղեկցուհին մի քանի անգամ դիտավորյալ հարվածել է նրան մարմնով, ապա ականջին վիրավորական արտահայտություն շշնջացել։ Տղամարդը չկարողանալով զսպվել՝ հայհոյել է, ինչից հետո ստացել է ապտակ ուղիղ երեխայի ներկայությամբ։ Դեպքի կապակցությամբ ընթանում է հետաքննություն, իսկ Delta-ի աշխատակցուհին արդեն հեռացված է աշխատանքից։