ՌԴ Պետդումայում արձագանքել են Ալիևի խոսքերին

Ադրբեջանի նախագահ Իլհամ Ալիևի հայտարարությունները Ռուսաստանի՝ Ուկրաինա «ներխուժման» մասին Պետդումայում գնահատել են որպես քաղաքական կոնյուկտուրա։ Պաշտպանության կոմիտեի անդամ, հատուկ նշանակության ուժերի վետերան Անդրեյ Կոլեսնիկը ОТР-ի հետ զրույցում նշել է, որ Ալիևը պարզապես փորձում է մեղադրանքը դնել Մոսկվայի վրա՝ արդարացնելու հարաբերությունների վատացումը։

«Այսօր իրեն ձեռնտու է այսպես խոսել։ Վաղը եթե ձեռնտու լինի մեզ հետ բարեկամանալ, կգտնի հարյուր պատճառ բացատրելու՝ ինչու այդպես ասաց և ինչու թշնամական էր վերաբերվում Ռուսաստանին։ Կասի, որ պարզապես քողարկվում էր», — ասել է Կոլեսնիկը՝ հավելելով, որ Ռուսաստանի իրական դաշնակիցները իր նավատորմն ու բանակն են։

Պետդումայի պատգամավոր Կոնստանտին Զատուլինը «Լենտա.ռու»-ի հետ զրույցում Ալիևի խոսքերը որակել է որպես հարված Ռուսաստանի դեմ՝ նշելով, որ Բաքուն սկզբից որդեգրել է Մոսկվայից տարբերվող, երբեմն էլ թշնամական դիրքորոշում։ Ավելի վաղ Ալիևը հայտարարել էր, որ Ադրբեջանը «ռուսական ներխուժման առաջին օրերից աջակցում է Ուկրաինայի տարածքային ամբողջականությանը», իսկ ԽՍՀՄ կազմ մտնելը համարել էր «օկուպացիա»։