Դերմատոլոգը բացատրեց՝ ինչու յուղոտ ուտելիքը չի առաջացնում պզուկներ

Դերմատոլոգ Ռոզալինդ Սիմփսոնը The Guardian-ի հետ զրույցում հերքել է տարածված կարծիքը, թե յուղոտ սնունդը պզուկների հիմնական պատճառներից է։ Բժշկի խոսքով՝ մաշկի վիճակի վրա սննդի այս տեսակները էական ազդեցություն չունեն։

Սիմփսոնը նշել է, որ պզուկները հիմնականում առաջանում են սեռական հասունացման շրջանում՝ անդրոգեն հորմոնի բարձրացման պատճառով։ Այդ հորմոնը խթանում է մաշկի ճարպագեղձերի աշխատանքը, և արտադրած ճարպը, միանալով մահացած բջիջների հետ, խցանում է ծակոտիները՝ ստեղծելով բարենպաստ միջավայր բակտերիաների բազմացման համար։

Բժիշկը նաև ընդգծել է, որ պզուկների առաջացումը կարող է կապված լինել արտաքին գործոնների հետ՝ սթրեսի մակարդակ, շրջակա միջավայրի վիճակ կամ մեծ քանակությամբ չմաքրված շաքարի օգտագործում։ Միևնույն ժամանակ, նա հորդորել է չպահել հատուկ դիետաներ՝ պզուկների դեմ պայքարի համար, քանի որ դրանք վտանգավոր են թե՛ ֆիզիկական, թե՛ հոգեբանական առողջության համար։