Պետք է ավելի ուշադիր լինել հայկական մշակութային ժառանգության նկատմամբ. հուշարձանագետ

«Դեռևս 1837թվականին վրացի հետազոտող Պ. Իոսելիանին կարծիք էր հայտնել, թե 1703-ին հայերը հիմնել էին Սբ. Նշան եկեղեցին՝ դրանից առաջ գոյություն ունեցած վրաց ուղղափառ եկեղեցու տեղում», – լրագրողների հետ այսօր կայացած հանդիպման ժամանակ անդրադառնալով Սբ. Նշան եկեղեցու ազգային պատկանելիության խնդրին՝ ասաց Հայկական ճարտարապետությունն ուսումնասիրող ընկերության նախագահ Սամվել Կարապետյանը։

Հիշեցնենք, որ վրաց պատրիարքարանի կողմից կասկածներ էին հնչել եկեղեցու պատկանելիության վերաբերյալ:

Բանախոսի խոսքերով՝ ներկայիս եկեղեցու տեղում հայկական հին եկեղեցու գոյության ապացույցները երեքն են. առաջինն այն խորհրդատետրն է, որի հիշատակարանում մատնանշված գրչության վայրը անորոշ է համարվել, ինչի հետևանքով քննությունից դուրս է մնացել: Կեսարացի Անդրի քահանան 1624-ին ձեռագիրը փոխանցել է Տփղիսի Սբ. Նիկողայոս եկեղեցուն: Հետևաբար այդ թվականին քաղաքում գոյություն ունեցող հայոց եկեղեցիների թվում կար նաև Սբ. Նիկողայոս անվամբ եկեղեցի:

Երկրորդ վկայությունը վերաբերում է 1656-ին գրիչ Աղամալ Ջուղայեցու ձեռքով Տփղիսի Մուղնու Սբ. Գևորգ եկեղեցում ստեղծված և Սբ. Նշան եկեղեցուն նվիրաբերված Գանձարանին։

Երրորդ վկայությունն էլ 1672-ին, ի թիվս քաղաքի հայկական 8 եկեղեցիների, Սբ. Նշանը հիշատակում է նաև Ֆրանսիայի հայտնի ճանապարհորդ Ժան Շարդենը։

«Բազմաթիվ հայկական եկեղեցիներ ոչնչացվել են Վրաստանում, և այդ մարտավարությունը դեռ շարունակվում է, ուստի մենք պետք է ավելի հետևողական և ուշադիր լինենք հայկական ժառանգության նկատմամբ», – նշեց հուշարձանագետը: