Պեղումներ Ֆյուլե-Հայաստանի ղեկավարություն հանդիպումից

Տեսնենք, թե ինչ է քննարկել Ֆյուլեն անվտանգության խորհրդի քարտուղար Արթուր Բաղդասարյանի հետ. նախ' Հայաստան-ԵՄ համագործակցության առկա վիճակն ու հեռանկարը: Կողմերը համագործակցության մակարդակը եւ հատկապես դրա արագ զարգացումը դրական են գնահատել, Ա. Բաղդասարյանը իրականացվող ծրագրերի հաջող ընթացքն է նշել: Նախագահի եւ վարչապետի հետ քննարկումների թեմաները վերստին քննարկելուց հետո Ֆյուլեն նշել է (ուշադրություն' նոր երանգ), որ Արեւելյան գործընկերության Վիլնյուսյան գագաթաժողովը շրջադարձային է լինելու ԵՄ-Հայաստան հարաբերությունների տեսակետից, քանի որ ստորագրվելիք Ասոցացման համաձայնագիրը (եւ նրա ներքո համաձայնագրերը) կարող են դառնալ քաղաքական ասոցացման (հիշեցնենք'ասոցացում հայերեն նշանակում է ընկերակցություն), ինչպես նաեւ տնտեսական ինտեգրման իրական գործիք: Եվ Ֆյուլեն մի անգամ էլ Ա. Բաղդասարյանին է խոստացել' շարունակել աջակցությունը բարեփոխումներին:

Համենայն դեպս' Ֆյուլեն ինքը երեկ լրագրողների հետ հանդիպմանը որոշ բացահայտումներ արեց' նշելով, որ Հայաստանի նախագահի հետ հանդիպումն ու զրույցը շատ լավ է ստացվել, դեռ հաճոյախոսեց Հայաստանին, թե հաճելի է այցելել եւ տեսնել մշակույթի արմատների երկիրը: Ասաց, որ ուզում է հերքել այն առասպելը, որ Արեւելյան գործընկերության մեջ երկրների անհատականությունը կորչում է, ճիշտ հակառակն է' ընդհանուր գործիքներով ամեն գործընկեր երկրի հարմար լուծում է առաջարկվում: Նա խոսեց նաեւ այն մասին, որ հանդիպել է Հայաստանի քաղաքական ուժերի եւ կառավարության հետ' կանգ առնելով ԵՄ 6 գերակայությունների վրա եւ շեշտելով, որ պիտի շարունակեն աշխատել հանձնարարականներն ի կատար ածելու եւ օրենսդրական փոփոխությունները վերջնականապես իրականացնելու ուղղությամբ:

Ֆյուլեն կեսկատակ-կեսլուրջ ասաց նաեւ, որ եթե Հայաստանը ժամկետներից դուրս գա, դատի կտան Հայաստանին: Նա թեեւ ավելացրեց, որ կատակում է, սակայն հայտնի է, որ բոլոր լուրջ բաները հաճախ ասվում են կատակով: Ստորագրվելիք համաձայնագիրը իրավական պարտադիր ուժ ունի, այնպես որ Հայաստանի իշխանությունները պետք է հասարակությանը բացատրեն դրա անդրադարձները Հայաստանի կյանքի վրա (այդ փաստաթուղը Հայաստանի Ազգային ժողովը պետք է վավերացնի): Նա նաեւ հստակեցրեց խոստումները' 2014-20 թվականներին լուրջ ֆինանսական օժանդակություն է լինելու այն երկրներին, որոնք Ասոցացման պայմանագրով խթանելու են բարեփոխումները: Անդրադառնալով ռուսական տնտեսական ճնշումների վերաբերյալ խնդրին (գազի գնի բարձրացում, Ադրբեջանին զենքի վաճառք), նա խնդիրը վերահասցեագրեց մեզ. Հայաստա՛նը պետք է ասի' ճնշում կա՞, թե՞ ոչ: ԵՄ-Հայաստան հարաբերությունները գործընկերային են, այստեղ ճնշում չի կարող լինել, ըստ հանձնակատարի: Եվ ուղիղ դրեց հարցը. արդյոք Ասոցացման համաձայնագիրը սահմանափակելո՞ւ է ուղիղ եւ անուղղակի հարաբերություններ հաստատելու ներուժը հարեւանների հետ, եւ ինքն էլ պատասխանեց' «Հստակ ոչ»: Դեռ ինչ-ինչ հնարավորություններ կավելացնի հարեւանների հետ հարաբերվելիս, կամրացնի դիրքերը տարածաշրջանային համագործակցության առումով, վստահ էր հանձնակատարը: Նա ասում էր' անհեթեթություն է այն, թե պետք է ընտրել' ո՞ւմ հետ համագործակցել, Արեւելյան գործընկերությունը բացասական ազդեցություն չի ունենա ավանդական կապերի վրա' Ռուսաստան կամ միջնորդավորված հարեւաններ: Ռուսների հետ նույնպես ԵՄ-ն համագործակցում է' աշխատելով առեւտուրն ամրապնդելու եւ խոչընդոտները չեզոքացնելու ուղղությամբ:

Մանրամասները` «Ազգ»-ի այսօրվա համարում: