Այսօր ռեժիսոր և դերասան Եվգենի Վախթանգովի 129-ամյակն է

«Ես ուզում եմ, որ հանդիսականը թատրոնում գլուխ չհանի իր զգացողություններից, այլ դրանք տուն տանի և դրանցով ապրի երկար ժամանակ: Դա կարելի է անել, եթե դերակատարները պիեսի մեջ իրենց սրտերը միմյանց առջև կարողանան բանալ առանց կեղծիքի... դուրս քշեն թատրոնը թատրոնից»:

Եվգենի Վախթանգով

Եվգենի Վախթանգովը ծնվել է հայ մեծահարուստ գործարանատիրոջ ընտանիքում: 1893–1903 թթ-ին սովորել է Թիֆլիսի, ապա՝ Վլադիկավկազի գիմնազիաներում: 1901թ-ից բեմադրել է պիեսներ, խաղացել ներկայացումներում։ 1903 թ-ին ընդունվել է Մոսկվայի համալսարանի բնագիտության, ապա տեղափոխվել իրավաբանության ֆակուլտետ։

Նա խաղացել է Թեքլտոնի (Չառլզ Դիքենսի «Օջախի ճռիկը»), Բրենդելի (Հենրիկ Իբսենի «Ռոսմերսհոլմ») և այլ դերեր։ Վախթանգովի ստեղծագործության գաղափարական մեկնակետը առավել դրսևորվել է նրա ռեժիսորական արվեստում [Գերհարտ Հաուպտմանի «Հաշտության տոն», Բերգերի «Ջրհեղեղ» (խաղացել է նաև Ֆրեզերի դերը)։

Նրա լավագույն բեմադրություններից են Վիլյամ Շեքսպիրի «Տասներկուերորդ գիշերը», Անտոն Չեխովի «Հարսանիքը», Մ. Մետեռլինկի «Սուրբ Անտոնիոսի հրաշագործությունը», Յուհան Սթրինդբերգի «Էրիկ XIV-ը», Սեմյոն Ան-սկու «Հադիբուկը»:

Դեռևս Վլադիկավկազում Վախթանգովն առնչվել է հայ թատերական գործիչների հետ, դիտել է Սիրանույշի և Հովհաննես Աբելյանի խաղը: 1910-ական թվականներին ծանոթացել է Հովհաննես Զարիֆյանի, Օվի Սևումյանի, Արշավիր Շահխաթունու, Համո Բեկնազարյանի, Ռուբեն Մամուլյանի հետ: 1920 թ-ին Ստանիսլավսկու համակարգի մասին դասախոսություններ է կարդացել Մոսկվայի հայկական դրամատիկական ստուդիայում: Նրա ռեժիսորական արվեստն ազդել է Արշակ Բուրջալյանի, Արմեն Գուլակյանի, հատկապես Վարդան Աճեմյանի ստեղծագործության վրա:

«...Ես սիրում եմ Ձեզ (Վախթանգովին)՝ որպես բազմատաղանդ արվեստագետի, և արվեստում կատարյալին ձգտելու համար ... Հավատում եմ և գիտեմ, որ Ձեր ընտրած ուղին կտանի Ձեզ դեպի մեծ և արժանավոր հաղթանակ». Կոստանտին Ստանիսլավսկի (ռեժիսոր, դերասան):