Եվրոպայում հասկացան՝ Հայաստանի համար կան իրողություններ, որ անհնար է անտեսել. քաղաքագետ

Եվրոպայում գործընթացների ճիշտ գնահատման և իրադարձությունների հասունացման արդյունքում հասկացան, որ կան իրողություններ, որոնք հնարավոր չէ անտեսել և կտրուկ ճնշումների օգնությամբ հասնել արդյունքների: «Եվրոպական ինտեգրացիա» ՀԿ նախագահ, քաղաքագետ Կարեն Բեքարյանի բնութագրմամբ, Երևանում բազմից խոսվել է, որ Հայաստանի և Եվրամիության համար ռազմավարական գործընկերության պայմանագրի կնքումն անհրաժեշտ է և բխում է երկկողմ շահերից: «Այս առումով նորություն չկա, նորությունն այն է, որ Եվրոպայում խնդիրը հասունացել է: Դա կապված է շատ պայմանների հետ: Նրանք հասկացան, որ շատ ուժեղ ստիպելու և ճնշումների արդյունքում հակառակ արդյունքն է ստացվում»,- «Արմենպրես»-ի հետ զրույցում ասաց Կարեն Բեքարյանը՝ հավելելով, որ Եվրոպայում դա հասկացան առաջին հերթին Ուկրաինայի քաղաքական ճգնաժամի հետ կապված:

«Նրանք հասկացան, որ կանոնները պետք է փոխվեն: Եվրոպայում այժմ գիտեն, որ Հայաստանի համար կան իրողություններ, որոնք անհնար է անտեսել: Այս առումով շատ կարևոր է և միաժամանակ բնական, որ այդ ընկալումները պետք է տեղ հասցներ և համագործակցության մասին խոսեր Եվրամիությունում Հայաստանի համար ամենամոտ գործընկերը: Այն, որ դա հնչում է Ֆրանսիայի նախագահի շուրթերից՝ դրական է և հասկանալի»,- ասաց Բեքարյանը՝ հավելելով, որ բնական գործընթաց է, որ Հայաստանը Եվրամիության հետ պետք է ունենա հարաբերությունների խոր շրջանակ:

«Նույն արժեքային համակարգն է, զարգացման հեռանկարի հանդեպ հավատամքը, և բնական է, որ այդ հարաբերությունները պետք է կառուցվեն իրավապայմանագրային դաշտում: Եթե պայմանագիրն ասոցացման չի և այլ անունով է լինելու, ի՞նչ է, հարաբերությունները չե՞ն հաստատվելու և շարունակելու: Չէ՞ որ Հայաստանը Եվրամիության հետ հսկայական ճանապարհ է անցել: Թեկուզ հիշենք այն փաստը, որ Հայաստանը պատրաստ էր նախաստորագրել Ասոցացման համաձայնագիրը: Դա նշանակում է, որ վիճակն ու պայմաները բավարար են: Ավելին, երբ չստորագրվեց համաձայնագիրը, Հայաստանը կրկին ընդգրկվեց GSP+ համակարգում: Այս ամենը ենթադրում է, որ պետք է լինի համագործակցության շատ նորմալ փաթեթ: Հիմա դա ի՞նչ անվանում կունենա՝ երկրորդական է: Չի լինի ասոցացման, թող լինի ռազմավարական: Այս պարագայում համաձայնագրի բացակայությունն է անբնական, այլ ոչ թե անվանման փոփոխությունը»,- ասաց Բեքարյանը՝ հավելելով, թե միաժամանակ շատ ցավալի է, որ Եվրամիությունում իրենց սխալների մասին հասկացան մի շարք երկրների ճգնաժամի արդյունքում:

Արդյոք Եվրամիությունը խորությամբ ճանաչե՞լ է նախկին խորհրդային պետությունների պատմությունն ու առանձնահատկությունները, Բեքարյանը դժվարանում է պատասխանել: Սակայն նա հավաստիացնում է, որ Եվրամիությունում գոնե ընկալել են, որ ավելի լավ է մի քայլ անելուց առաջ տասն անգամ չափել և որոշ ժամանակ ու էներեգիա ծախսել գործընկերներին ճանաչելու առումով, քան ուղղակի ճնշումներ գործադրել:

«Նրանք հասկացան, որ ֆորմալ ռեգուլյատորներով համագործակցելը սխալ է»:

Մայիսի 12-13-ը երկօրյա պետական այցով Հայաստան ժամանած Ֆրանսիայի նախագահ Ֆրանսուա Օլանդը հայտարարել էր, որ իր երազանքն է, որ Հայաստանն ամբողջությամբ ասոցացվի Եվրամիությանը և այդ կապակցությամբ շեշտել, որ Եվրամիությունը պետք է առանձնահատուկ ուշադրություն դարձնի Հայաստանի աշխարհագրական դիրքին և շրջափակմանն ու հատուկ պայմաններ առաջարկի: Ֆրանսուա Օլանդի հետ ասուլիսի ժամանակ էլ ՀՀ նախագահ Սերժ Սարգսյանը հայտարարել էր, որ Հայաստանի անդամակցությունը Մաքսային միությանը չի կարող խոչընդոտել հարաբերությունների զարգացմանը Եվրամիության հ ետ: Ինչ վերաբերում է ԵՄ-ի հետ ասոցացմանը' Նախագահ Սարգսյանը շեշտել էր, որ անհրաժեշտ են հատուկ առաջարկություններ և պայմաններ: