ՄԱԿ-ի հանձնաժողովը շարունակում է պնդել ՀՀ-ում «Հայ եկեղեցու պատմություն» առարկայի պարտադիր դասավանդումը վերացնելու մասին

Միավորված ազգերի կազմակերպության (ՄԱԿ) երեխայի իրավունքների հանձնաժողովի՝ ՀՀ երրորդ և չորրորդ համատեղ պարբերական զեկույցն առաջարկում է վերանայել դպրոցների ուսումնական ծրագիրը՝ դրանում արտացոլելով բոլոր երեխաների կրոնի ազատությունը և վերացնելով «Հայ եկեղեցու պատմություն» առարկայի պարտադիր դասավանդումը: ՄԱԿ-ում մտահոգիչ են համարում հանգամանքը, որ երկնքում առավել տարածված կրոնի ուսուցումը պարտադիր առարկա է դպրոցների ուսումնական ծրագրերում:

«2013թ. այս դիտարկումը վերաբերում է առարկայի դասավանդման պարտադիր պայմանին և կրոնական փոքրամասնություններին պատկանող երեխաների (օրինակ՝ եզդի, մոլոկան երեխաների կամ ավետարանական եկեղեցուն դավանող փոքրամասնությունների երեխաների) իրավունքների հանդեպ հարգանքին, այլ ոչ թե հայ եկեղեցու պատմությանը` որպես խնդրո առարկա: Ըստ ՄԱԿ-ի երեխայի իրավունքների կոնվենցիայի 14-րդ հոդվածի, անդամ պետությունը պետք է հարգի երեխայի մտքի, խղճի և կրոնի ազատության իրավունքը: Հայաստանը հաստատել է կոնվենցիան 1993 թվականին»,- նշել է ՅՈՒՆԻՍԵՖ-ի հայաստանյան ներկայացուցիչ Հենրիետ Արենսը:

Հանձնաժողովն այս դիտարկումները մշակում է՝ հիմնվելով անդամ պետության կառավարության և հասարակական կազմակերպությունների ներկայացրած տարեկան զեկույցների վրա՝ նպատակ ունենալով աջակցել անդամ պետություններին` հարգելու ՄԱԿ-ի երեխայի իրավունքների կոնվենցիայի դրույթները: Անդամ պետություններն իրենց հաջորդ զեկույցում պետք է ընդգրկեն համախատասխան տեղեկատվություն, թե ինչպիսի հետևողական քայլեր են արվել մտահոգության տեղիք տվող հիմնական ոլորտների բարելավման և առաջարկությունների կատարման ուղղությամբ, կամ թե` ինչ նկատառումներով դրանք չեն իրագործվել:

ՄԱԿ-ի կողմից նման բովանդակությամբ զեկույցներ էլի են եղել, որոնց կոնկրետ և հասցեական պատասխան է տվել ՀՀ կրթության և գիտության նախարար Արմեն Աշոտյանը: Մասնավորապես, մայիսի 20-ին լրագրողների հետ կարճատև զրույցի ժամանակ նա նշել է, որ ուսումնական ծրագրի բովանդակությունը որոշում է Հայաստանի կառավարությունը: «Կրթական քաղաքականությունը մշակվում է Հայաստանում և այդ զեկույցները չեն կարող ազդեցություն ունենալ կրթական բովանդակության վրա: Մենք կարիք չունեք փորձագիտական եզրակացության, որպեսզի ՀՀ Սահմանադրությամբ ամրագրված` Հայ Առաքելա կան եկեղեցու կատարած առաքելությունը դնենք հարցականի տակ: Բացի այդ, այդ զեկույցները գնահատական են և ոչ թե պարտադիր կատարման կոչ: Այն ինչ անում ենք եկեղեցու հետ` ճիշտ ենք անում, և դեռ անելու շատ գործ կա: Այդ գործընթացը խղճի ազատության հետ կապ չունի, այլ զարգացնում ենք մեր պատանիների հայրենի ինքնության ճանաչումը, ներկայացնում պատմությունը, որտեղ հայ եկեղեցու դերը եղել է բացառիկ և դա ամրագրված է Սահմանադրությամբ: Եվ եթե ինչ-որ մարդկանց մոդայիկ է թվում լսել հակառակը, հակառակվել եկեղեցուն և պատմությանը, ես դա թողնում եմ իրենց խղճի ազատ ությանը»,- ասել է Արմեն Աշոտյանը: