Լրացավ Ալեքսանդր Սպենդիարյանի ծննդյան 140–ամյակը

140 տարի առաջ նոյեմբերի 1–ին Ուկրաինայի Կախովկա ավանում ծնվեց Ալեքսանդր Սպենդիարյանը, ով պիտի դառնար հայ դասական երաժշտության հիմնադիրը:

Կյանքի մեծ մասն անցկացնելով հայրենիքից հեռու՝ Սպենդիարյանն իր ուսուցիչ Ռիմսկի-Կորսակովի խրախուսմամբ ուսումնասիել է հայկական ժողովրդական երաժշտությունը, ինչի շնորհիվ էլ նրա ստեղծագործություններում առկա է հայ ոգին:

Ստեղծագործական բուռն տարիներին Սպանդիարյանն ապրում էր Ղրիմում՝ ծավալելով ստեղծագործական, խմբավարական, մշակութային եւ հասարակական աշխույժ գործունեություն: Այս շրջանում նա հաստատում է բարեկամական մտերմիկ հարաբերությունները Չեխովի, Գորկու, Ռեպինի, Ռախմանինովի, Շալյապինի, Կուպրինի, Գլազունովի և այլ մեծ արվեստագետների հետ, որոնք հաճախ էին հյուրընկալվում Սպենդիարյանների Յալթայի առանձնատանը:

Կյանքի վերջին տարիներին՝ 1924 թ., ՀԽՍՀ կառավարությունը Սպենդիարյանին հրավիրում է Հայաստան, ուր նա ապրում է մինչև իր մահը՝ 1928 թ:

Հայաստանում Սպենդիարյանը ծավալում է բուռն գործունեություն: Նրա ջանքերով Կոնսերվատորիայում բացվում է առաջին նվագախմբային դասարանը և կազմակերպվում է առաջին սիմֆոնիկ նվագախումբը, որի անդրանիկ համերգը նույն 1924-ի դեկտեմբերին ղեկավարում է անձամբ Սպենդիարյանը:

Հայրենիքում նա իր համար բացահայտում է Կոմիտասին, ում սկսում է համարել իր ուսուցիչներից մեկը:

Սպենդիարյանի երաժշտական հարուստ ժառանգության ամենահայտնի նմուշներն են «Ալմաստ» օպերան, «Երևանյան էտյուդներ», «Ղրիմյան էսքիզներ», «Երեք արմավենի» և բազմաթիվ այլ սիմֆոնիկ երկեր, ռոմանսներ, ձայնային–գործիքային երկեր և այլն։

Սպենդիարյանի անունով են կոչվում Հայաստանի Օպերայի և բալետի ազգային ակադեմիական թատրոնը և Երևանի թիվ 1 երաժշտական դպրոցը։