Հայաստանի հուշարձանների մեծ մասը վթարային են

Հայաստանի հուշարձանների մեծ մասը գտնվում են վթարային վիճակում՝ հուշարձանի որևէ մի մասնիկի բացակայության դեպքում կտրուկ նվազում է նրա սեյսմակայունությունը:

Այս մասին այսօր լրագրողների հետ հանդիպման ընթացքում ասաց ՀՀ մշակույթի նախարարության Պատմության և մշակույթի հուշարձանների վերականգման բաժնի պետ Դորվարդ Առուշանյանը:

Խոսելով Սանահինի վանքի մասին՝ Առուշանյանը ասաց, որ ինքը դժվարանում է պատասխանել, թե ինչ ուժգնության երկրաշարժի կարող է դիմանալ այն. «Մեր նպատակը ոչ թե հուշարձանի սեյսմակայունությունը բարձրացնելն է, այլ նախնական տեսքով դրա ճիշտ վերականգնումը, հակառակ դեպքում՝ կկորցնի իր պատմաճարտարապետական արժեքը: Այդ ուղղությամբ տարվում են համապատասխան աշխատանքներ՝ կազմվում է հուշարձանի տեխնիկական վիճակի մասին համապատասխան եզրակացություն, փոխվում են մաշված քարերը և այլն», - ասաց Դորվարդ Առուշանյանը:

Սեյսմիկ պաշտպանության ազգային ծառայության հյուսիսային բաժանմունքի պետ Սերգեյ Նազարեթյանն իր հերթին նշեց, որ Սպիտակի երկրաշարժից հետո կատարված իրենց հետազոտությունների համաձայն՝ հայկական եկեղեցիները վնասվածքներ կարող են ստանալ 8 և բարձր բալանոց երկրաշարժի դեպքում: Նա նշեց նաև, որ ընդհանուր առմամբ 7-13 դարերում կառուցված եկեղեցիներն ավելի սեյսմակայուն են կառուցման վայրի ճիշտ ընտրության պատճառով:

Ինչպես տեղեկացրեց Սերգեյ Նազարեթյանը, աղետի գոտում գտնվող 8000 հուշարձաններից 200-ը խիստ վնասվել են, 155-ը անդարձ կորել, 10 եկեղեցի խոնարհվել է աղետին: «Աղետի գոտում հուշարձանների վերկանգման հարցը պատշաճ ուշադրության չի արժանացել, սակայն արդիական է դարձել Վանում տեղի ունեցած երկրաշարժից հետո», - նշեց նա: