HSBC բանկի ղեկավարը հաշիվ է ունեցել Շվեյցարիայի՝ ֆինանսական սկանդալին խառը բաժանմունքում

Մեծ Բրիտանիայի HSBC բանկի ղեկավարը եղել է նրանց թվում, ովքեր հաշիվներ են ունեցել այս ֆինանսական հիմնարկության՝ Շվեյցարիայի բաժանմունքում, որը վերջին շաբաթներին հայտնվել է խոշոր ֆինանսական սկանդալի կենտրոնում: Ինչպես տեղեկացնում է «Արմենպրես»-ը՝ հղում անելով The Guardian թերթին, HSBC-ի գործադիր տնօրե ն Ստյուարտ Գուլիվերն այն հաշվի փաստացի սեփականատերն է, որը բանկի՝ Շվեյցարիայի մասնաճյուղում բացվել է Պանամայում գրանցված Worcester Equities Inc. ընկերության անունով: Վերջինիս հաշիվներում 2007 թվականի դրությամբ բանկում եղել է 7,6 միլիոն դոլար:

Հրատարակությունն այս տեղեկատվությունը տարածել է HSBC-ի ղեկավարի համար չափազանց անհարմար պահի՝ բանկի ամենամյա հաշվետվության հրապարակումից մի քանի ժամ առաջ: Գուլիվերն այն կներկայացնի փետրվարի 23-ին, և նրան հազիվ թե հաջողվի խուսափել լրագրողների և ներդրողների հարցերից:

Ամսվա սկզբին The Guardian-ը, ինչպես նաև մի քանի այլ զանգվածային լրատվամիջոցներ հաղորդել էին, որ աշխարհում մեծությամբ երկրորդ բանկի՝ Շվեյցարիայի բաժանմունքը երկար տարիների ընացքում իր գաղտնի հաշիվներում զետեղել է սպասարկյալների միջոցներ, որոնք այդ կերպ իրենց հայրենիքում խուսափել են հարկերի վճարումից: Ըստ որում բանկի սպասարկյալների թվում եղել են հայտնի անձինք, ինչպես նաև կազմակերպված հանցավորության և դիկտատորական վարչակարգերի հետ կապված մարդիկ:

Ինչպես նշում է ՏԱՍՍ-ը, հաճախ այդ հաշիվները բացվել են կեղծ անուններով, իսկ որպեսզի ավելի բարդ լինի միջոցների շարժմանը հետևելը, պատկառելի գումարների կանխիկ միջոցներն սպասարկյալներին են տրվել նրանց անհրաժեշտ արժույթով:

Զանգվածային լրատվամիջոցներն այս տեղեկատվությանը հասու դառնալու հնարավորություն են ստացել HSBC-ի՝ Ժնևի բաժանմունքի նախկին աշխատակից Էրվե Ֆալչիանիի շնորհիվ, որը 2007 թվականին հափշտակել է բանկի, այդ թվում՝ նաև Շվեյցարիայի բաժանմունքի 130 հազար սպասարկյալների մասին տեղեկատվությունը: