Արտակ Զաքարյանը Հայաստանում կառավարման ճգնաժամ չի տեսնում

Ազգային ժողովի ՀՀԿ խմբակցության պատգամավոր Արտակ Զաքարյանը համոզված է, որ Հայաստանի Հանրապետությունում կառավարման ճգնաժամ գոյություն չունի: Ազգային ժողովում պատգամավորների 1/3-ի նախաձեռնությամբ ներկայացված՝ «Հայաստանում կառավարման ճգնաժամի մասին» հայտարարության նախագծի քննարկման ժամանակ Արտակ Զաքարյանը նշեց, որ նախագծում տեղ գտած դրույթները տրամաբանական չեն: «Ես կարծում եմ, որ մենք պետք է այս նախագծում տեղ գտած դրույթների վերաբերյալ մանրամասն քննարկումեր անցկացնենք և մեր գործընկերներին ապացուցենք, որ այդ դրույթները ոչ թե չեն համապատասխանում իրականությանը, այլ չկա տրամաբանական կապը՝ այդ դրույթները թվարկել և գալ եզրակացության, որ Հայաստանում կա կառավարման համակողմանի ճգնաժամ: Նախ ասեմ, որ քաղաքական ճգնաժամը դասական իմաստով այն է, երբ վտանգված է օրենսդիր գործունեությունը, երբ համապատասխան իրավասու մարմինները ի զորու չեն լինում կայացնել քաղաքական որոշումներ: Նման իրավիճակ Հայաստանում գոյություն չունի և կառավարման վերահսկողությունն առկա է բոլոր ոլորտների նկատմամբ»,- «Արմենպրես»-ի հաղորդմամբ՝ ընդգծեց Զաքարյանը:

Անդրադառնալով նախագծում տեղ գտած դրույթներին' Հայաստանում առկա տնտեսական ճգնաժամի վերաբերյալ՝ նա նկատեց, որ Հայաստանում տնտեսական խնդիրներ, իհարկե, կան, սակայն դա անվանել տնտեսական ճգնաժամ, խելամիտ չէ:

Պատգամավորը համաձայնեց, որ արտաքին քաղաքական դաշտում, միջազգային հարաբերություններում լինում են ճգնաժամեր, որոնց մասին պատմությանը հայտնի են բազմաթիվ դեպքեր: «Սակայն Հայաստանը վերջին տարիներին իր կողմից իրականացված արդյունավետ և նախաձեռնողական քաղաքականության շնորհիվ կարողացել է դուրս գալ այն իրավիճակներից, որոնք կարող էին երկիրը քաշել ճգնաժամային դրության մեջ: Խոսքը Հայաստան Եվրամիություն հարաբերությունների, և Հայաստան-Ռուսաստան հարաբերությունների, և տարածաշրջանային խնդիրների, և Մերձավոր Արևելքում տեղի ունեցող զ արգացումներում, և Հայաստան-Սփյուռք հարաբերությունների, ինչպես նաև Լեռնային Ղարաբաղի հակամարտության խաղաղ կարգավորման գործընթացի մասին է, որի նկատմամբ արտաքին սպառնալիքները իրականում մեծանում են: Սակայն, դիվանագիտությունը և արտաքին քաղաքականությունը նրա համար են, որպեսզի հնարավոր լինի դիմագրավել այդ սպառնալիքներին և համարժեք պատասխան տալ: Այսօր մեր արտաքին քաղաքականությունն, առավել քան երբևէ, ոչ միայն ի զորու է, այլ նաև ակտիվ գործոն է տարածաշրջանում և դրանից դուրս: Փաստը հայ-թուրքական հարաբերություններն են: Անկախ դրանց ելքից՝ հայ-թուրքական հարաբերություններն աշխատեցին Հայաստանի արտաքին քաղաքական կապիտալն ավելացնելու օգտին»,- շեշտեց պատգամավորը:

Անդրադառնալով հնչող տեսակետներին, թե Հայաստանը ձախողել է Եվրամիության հետ հարաբերությունները՝ Արտակ Զաքարյանն ասաց, որ Եվրամիությունում ոչ ոք չի կարծում, թե Հայաստանը երկկողմ և բազմակողմ ձևաչափերում ձախողել է հարաբերությունները ԵՄ-ի հետ: «Ընդհակառակը, առաջ են եկել նոր հնարավորություններ, նոր հետաքրքրություն կա Եվրամիության կողմից Հայաստանի հետ հարաբերությունների զարգացման առումով»,- հայտարարեց Զաքարյանը:

Նա հավաստեց նաև, թե որևէ մեկը չի կարող ասել, որ Լեռնային Ղարաբաղի հակամարտության խաղաղ կարգավորման գործում Հայաստանի, ինչպես նաև Լեռնային Ղարաբաղի Հանրապետության բնակչության հետապնդած շահերը որևէ կերպ նահանջել են: «Ես չեմ կարծում, որ տեղին է սրանց մասին խոսելն այս փաստաթղթի մեջ, որը, որպես եզրահանգում, բերում է նրան, որ Հայաստանում կա կառավարման ճգնաժամ»,- ընդգծեց պատգամավորը:

Ազգային ժողովը քննարկում է «Հայաստանում կառավարման ճգնաժամի մասին» հայտարարության նախագիծը, որը խորհրդարանի քննարկմանն են ներկայացրել ոչ իշխանական ուժերը: