«Գալիպոլիի տոնակատարության վերաբերյալ թուրքական որոշումն ամոթալի է». «Զաման»-ի հոդվածագիր

Ապրիլի 24-ն արդեն պարզորոշ երևում է հորիզոնում, և այլևս չկա փախուստի ճանապարհ. այդ օրը ողջ աշխարհի ժողովուրդները կհիշատակեն Հայոց ցեղասպանությունը:

Ինչպես հաղորդում է «Արմենպրես»-ը, այս մասին թուրքական «Զաման» պարբերականում գրել է սյունակագիր Ջուսթ Լեգենդիջքը:

«Թուրքական կառավարությունը գործադրել է ամոթալի և բոլորի համար թափանցիկ քայլ' ուղղված այս տարելիցից հանրության ուշադրությունը շեղելուն' Գալիպոլիի հաղթանակի 100-ամյակը տեղափոխելով ապրիլի 25-ին: Դա չի աշխատի և կվնասի Թուրքիայի հեղինակությանը»,- գրել է հոդվածագիրը: Նա փաստել է, որ ապրիլի 24-ի նախօրեին շատ բաներ կասվեն և կգրվեն Օսմանյան կայսրությունում բնակվող հայերի հետ տեղի ունեցածի վերաբերյալ: Որպես օրինակ նա հիշատակում է Թոմաս դե Վաալի հեղինակած «Մեծ աղետ. հայերն ու թուրքերը Ցեղասպանության ստվերում» գիրքը, որտեղ հեղ ինակը կենտրոնացել է այն բանի վրա, թե ինչ տեղի ունեցավ 1915 թվականից հետո:

Լեգենդիջքը բերում է տարբեր մեջբերումներ գրքից' նշելով, որ դե Վաալը լավատեսորեն է տրամադրված, որ մի օր թուրքական հասարակությունը կսկսի հասկանալ, թե ինչպես շուրջ երկու միլիոն հայ «կորավ» Օսմանյան կայսրության անկման ժամանակաշրջանում: «Նա մեջբերում է Ջենգիզ Աքթարի խոսքը, ով ասում էր. «Մեռած մարմինը շատ ծանր է պահարանում պահելու համար»,- գրում է «Զաման»-ի հոդվածագիրը:

Նա հիշատակում է նաև դե Վաալի գրքից մի հատված, որտեղ դիարբեքիրցի մի հայ, ով այժմ բնակվում է Նյու Ջերսիում, ասել է. «Թուրքերի համար 100 տարին շատ վաղ է, սակայն մեզ համար'շատ ուշ»: Ի վերջո, հոդվածագիրն իր նյութը եզրափակել է դե Վաալի այն խոսքերով, համաձայն որոնց հնարավոր արդյունքի կարելի է հասնել հայ-թուրքական երկխոսությամբ, այլ ոչ թե առճակատմամբ: